बुटवल ः लुम्बिनी प्रदेशका पूर्व भूमि व्यवस्था, कृषि तथा सहकारी मन्त्री विजयबहादुर यादव आइतबार बैङ्किङ कसुरमा पक्राउ परेका छन्।
पूर्व मन्त्री यादव १२ लाख २८ हजार रुपैयाँको बैङ्क अफ काठमाडौँको चेक बाउन्स भएपछि पक्राउ परेको हो ।
गत माघ १० मा रुपन्देहीको सियारी गाउँपालिका–१ का उमाशङ्कर यादवका नाममा दिएको चेकमा पैसा नभएको भन्दै चेक बाउन्स भएपछि उनी पक्राउ परेका हुन् ।
मुद्दा दर्तापछि यादवविरुद्ध पक्राउ पुर्जी जारी भएको थियो । रुपन्देही प्रहरी प्रवक्ता एवं प्रहरी नायब उपरीक्षक श्याम अर्यालले बाँकेको डुडुवा गाउँपालिका होलीयाबाट आइतबार उनलाई प्रहरीले नियन्त्रणमा लिएको जानकारी दिए । २०७४ सालको निर्वाचनमा जनता समाजवादी पार्टी जसपाबाट निर्वाचित यादव गत वर्षको साउन ३१ मा नेकपा एमाले प्रवेश गरेका थिए ।
लुम्बिनी प्रदेश सभामा बाँकेको प्रदेश सभा निर्वाचन क्षेत्र ‘क’बाट निर्वाचित उनी लुम्बिनी प्रदेश सरकारका पूर्व भूमि व्यवस्था, कृषि तथा सहकारी मन्त्री रहेका थिए। पार्टीको निर्देशन विपरीत सरकारमा सहभागी भएको भन्दै जसपाले उनलाई कारबाही गरेको थियो । पार्टी कारबाहीमा परेपछि प्रदेशसभा सदस्य पद खोसिएका उनी एमाले नेता शङ्कर पोखरेल नेतृत्वको सरकारमा मन्त्री बनेका थिए ।