रामेछाप । गोकुलगंगा गाउँपालिकाले पहिरोमा परि मृत्यु भएका परिवारलाई आर्थिक सहयोग गर्ने निर्णय गरेको छ । बिहीबार साँझ गोकुलगंगा गाउँपालिका वडा नम्बर ६ फर्पुमा पहिरोमा परि एकै परिवारको तीन जना किशोरीको ज्यान गएको थियो । उक्त पहिरोमा परि ज्यान गुमाएकाका परिवारलाई गाउँपालिकाले आर्थिक सहयोग गर्ने निर्णय गरेको छ ।
बिहीबार राति पहिरोमा परी मृत्यु भएका गोकुलगंगा–६ फर्पुका तीन किशोरीका परिवारलाई राहत उपलब्ध गराउने निर्णय भएको गाउँपालिका प्रवक्ता एव वडा नम्बर ६ का अध्यक्ष चन्द्रबहादुर सुनुवारले जानकारी दिनुभयो ।
गाउँपालिकाका अध्यक्ष काजीबहादुर खड्का (दिनेश)को अध्यक्षतामा शनिवार बसेको गाउँ कार्यपालिको बैठकले उक्त निर्णय गरेको हो । मृतकका परिवारलाई प्रति परिवार ५० हजार राहत र १५ हजार काज किरिया खर्च सहित ६५ हजार नगद सहयोग प्रदान गरिने निर्णय भएको प्रवक्ता सुनुवारले बताउनुभयो । गोकुलगंगा गाउँपालिका–६ फर्पुमा अविरल वर्षासँगै बिहीबार राती विमान तामाङको घर माथिबाट झरेको पहिरोमा पुरिएर विमानकी १८ वर्षीया छोरी सिता तामाङ, पेमा तामाङकी १५ वर्षीया छोरी आशिका दोङ र विमानको जेठा छोरा पदम तामाङकी छोरी लक्ष्मी तामाङको मृत्यु भएको थियो । बाढी पहिरोका कारण पालिकाभर भएको क्षति र सम्भावित क्षतिको बारेमा वडा र विपद् व्यवस्थापन समितिले स्थानीय प्रहरीसँगको सहयोगमा प्राविधिक विवरण तयार गरी त्यसको व्यवस्थापनमा लाग्ने गोकुलगंगा गाउँपालिकाले जनाएको छ ।
पहिरो पीडित परिवारलाई विभिन्न सङ्घ÷ संस्थाहरूले समेत सहयोग गर्ने क्रम जारी छ । जिल्ला विपद् व्यवस्थापन समितिबाट २ लाख ५० हजार,नेपाली काँग्रेस रामेछापका सभापति एवं सांसद पूर्णबहादुर तामाङ (कान्छाराम) ले प्रति मृतक १०–१० हजारका दरले नगद रकम सहयोग गनुभयो । जिल्ला रेडक्रस सोसाइटीबाट लत्ता कपडा,भाँडा वर्तन सहयोग गरिएको छ । त्यस्तै राष्ट्रिय युवा सङ्घ नेपाल रामेछापले पनि खाद्यान्न सहयोग गरेको छ ।
