काठमाण्डौं । इलाम २ मा प्रतिनिधि सभा उपचुनावअन्तर्गत भएको निर्वाचनको केहिबेरमा मतगणना हुने भएको छ । मतगणनाका लागि सर्वदलीय बैठक भर्खरै सुरु भएको छ बैठक सके लगतै मतगणना गर्ने तयारी भएको प्रमुख जिल्ला अधिकारी इन्द्रदेव यादवले जानकारी दिए । छलफलका लागी अहिले राजनीतिक दलका उम्मेदवार र प्रतिनिधिहरू, स्वतन्त्र उम्मेदवार र प्रतिनिधिहरू सहितको बैठक भर्खरै सुरु भएको हो । शनिवार भएको चुनावमा मतपेटिका ल्याउन ढिलाइ भएपछि अहिले बिहानबाट मतगणना हुन लागेको हो ।
संविधानसभा अध्यक्ष सुवास नेम्वाङ निर्वाचित इलाम–२ मा उनको निधन भएपछि उपनिर्वाचन भएको हो । शनिवार भएको मतदानमा ६० प्रतिशत मत खसेको थियो । यो क्षेत्रमा १ लाख १५ हजार ८८९ मतदाता छन् । तीमध्ये ६९ हजार २८७ जनाले मतदान गरेका छन् । मुख्य निर्वाचन अधिकृत केशवप्रसाद घिमिरेले ६० प्रतिशत मत खसेको बताएका छन् । मतगणनाका लागि सदरमुकामस्थित सिटी हलमा व्यवस्था गरिएको छ ।
सिटी हलको एउटा कोठामा तार जाली लगाएर गणक मात्र भित्र बस्न मिल्ने र प्रतिनिधि बाहिरै बस्ने गरी गणना स्थल तयार गरिएको सहायक निर्वाचन अधिकृत इन्द्रकुमार श्रेष्ठले जानकारी दिए । उनका अनुसार गणना स्थलमा ११ वटा सिसी क्यामरा जडान गरिएका छन् । ’गणनाको अङ्क प्रत्येक घण्टा सार्वजनिक गर्ने तयारी छ,’ उनले भने, ‘इलाम चोक बजारको डिस्प्लेमा समेत मतगणनाको नतिजा सार्वजनिक गर्दै जाने तयारी गर्दैछौं।’
