रामेछाप । कोसी अस्पताल विराटनगरका पूर्वमेडिकल सुपरिटेन्डेन्ट डा. तपेश्वरलाल कर्ण पक्राउ परेका छन् । अस्पतालमा जन्मिएका शिशुलाई बिक्री गरेको फेला परेपछि डा. कर्ण पक्राउ परेका हुन्। विगतदेखि अवैध सम्बन्धबाट जन्मिएका शिशुलाई बिक्री गरेर धन आर्जन गर्दै आएका उनले केही दिनअघि अवैध सम्बन्धबाट जन्मेकी शिशु (छोरी) निःसन्तान दम्पतीलाई ५ लाख रुपैयाँमा बिक्री गरेको थियो ।
उक्त कुरा प्रहरीले जानकारी पाएपछि प्रहरीले उनी सहित शिशुका अविवाहित बाबु (जसले शिशु बेचेका थिए) लाई समेत पक्राउ गरेको छ । भोजपुर हतुवा गढी ४ घर भएका २७ वर्षीय अविवाहित गोविन्द राई र उनकी प्रेमिका २६ बर्सिया युवतीको सम्बन्धबाट जन्मिएको शिशुलाई डा. कर्णले मोरङको काटहरि गाउँपालिका २ आदर्श टोलका सूर्यनारायण राजवंशी दम्पतीलाई ५ लाख रुपैयाँमा बिक्री गरेका थिए । तर, प्रहरीले चाल पाएपछि बच्चा खरिद गर्ने सूर्यनारायण, उनकी पत्नी श्याम ती, आमा दिलमाया र दिदी सुधा राजवंशीलाई पनि प्रहरीले अनुसन्धानका लागि नियन्त्रणमा लिएर राखेको छ ।
