छैठौं अन्तराष्ट्रिय कराते च्याम्पियनशिप–२०७७ मा रामेछापले ५ स्वर्ण सहित ७ पदक जित्न सफल भएको छ । काठमाण्डौको ठमेलमा रहेको डोजोमा आयोजना भएको छैठौं अन्तराष्ट्रिय कराते च्याम्पियनशिप–२०७७ प्रतियोगितामा भारतको चार प्रान्त र नेपालका ६ जिल्ला गरी जम्मा १० टिम सहभागी रहेको थियो ।
भारतको चार प्रान्त र नेपालका ६ जिल्लाका खेलाडी बीच शुक्रबार र शनिबार भएको कुमोते र काता खेलमा रामेछापले ५ स्वर्ण सहित ७ पदक जितेको हो । कुमोते तर्फ ७० केजीमा दिक्षित थापा, ५५ केजीमा विशाल केसी, ५५ केजीमा सम्झना माझी र ५० केजीमा सरोज माझीले स्वर्ण पदक जितेका छन् । त्यस्तै कातामा सम्झना माझीले एक स्वर्ण पदक जितेकी छिन् । त्यसैगरी कुमोते तर्फ ६० केजीमा सदिक्षा खड्काले कास्य पदक जितेकी छिन् भने काता तर्फ बिमल सिंजालीमगले पनि कास्य पदक जितेका छन् ।
दुई देशबीच भएको खेलमा रामेछाप सहित ६ जिल्लाका खेलाडीले १७ स्वर्ण पदक हात पारेर नेपाललाई पहिलो बनाएको नेपाल तर्फका कोच शुक्र माझीले जानकारी दिए । ठमेल डोजोका आयोजनामा भएको छैठौं अन्तराष्ट्रिय कराते च्याम्पियनशिप–२०७७ प्रतियोगितामा भारतका १ सय ५० भन्दा बढी खेलाडीको सहभागीता रहेको थियो ।
