रामेछाप । जिल्लामा रहेको एकमात्र सरकारी अस्पताल जिल्ला अस्ताल रामेछापमा रहेका उपकरणहरु थन्किदा रामेछापका नागरिकहरुले स्वास्थ्य सेवा पाउनबाट वञ्चित भएका छन् ।
२०५० सालमा स्थापना भएको रामेछापको एकमात्र सरकारी अस्पताल जिल्ला अस्पतालमा अहिलेसम्म अल्ट्रासाउन्ड, आइसियु, भेन्टिलेटर, भिडियो एक्सरे र ल्यावसेवा संचालन हुन नसक्दा बिरामी भएका नागरिकहरुले सेवा पाउन सकेका छैनन् । बिरामी भएर अस्पतालमा उपचार लिन जाने सेवाग्राहीहरुलाई जिल्ला अस्पताल रामेछापले जिल्ला भित्रका निजि अस्पताल र राजधानी लगाएतका विभिन्न अस्पतालहरुमा रिफर गर्दै आएको जिल्ला अस्पताल रामेछापका प्रमुख डा.पबन शाक्यले जानकारी दिए ।
उनले भने– पहिला अस्पतालमा उपचार लिन आउने नागरिकहरुले उपकरण अभावमा त्यसै फर्कनु पर्ने वाध्यता थियो । अहिले अस्पताल परिसरमा सुविधा सम्पन्न भवन निमार्ण भएको छ । अस्पतालमा त्यही अनुसार आवश्यक सवै उपकरणहरु छ । तर आवश्यक जनशक्ति मन्त्रालयले पठाउन नसक्दा ती उपकरणहरु सबै थन्किएर बसेकाले नागरिकले सेवा पाउन नसकेको प्रमुख शाक्यले बताए ।
जिल्ला अस्पतालमा प्राप्त भएका उपकरण सामाग्रीहरु यत्रतत्र थन्काएर राखेको लामो समय भइसक्दा पनि ती सामाग्रीहरु प्रयोग नगर्दै बिग्रने अवस्थामा पुुगेका छन् । यता नागरिकहरुले भने सरकारी अस्प्तालबाट पाउनुु पर्ने सेवा सुविधा पाउँन नसक्दा निजी अस्पतालमा महङ्गो शुल्क तिरेर उपचार लिन वाध्य हुनुपरेको मन्थली नगरपालिका वडा नं ७ भटौलीका निर्माण माझीले जानकारी दिए ।
उनले भने– सरकारले सबै नागरिकहरुलाई गुणस्तरीय स्वास्थ्य सेवा प्रदान गर्ने भन्छ । जिल्लामा आवश्यक उपकरण पठाएको छ पनि भन्छ । तर अस्पतालमा उपचार लिन पुग्दा केही सुविधा पाइदैन । हामी गरिव नागरिकले सरकारी स्वास्थ्य सुविधा लिनवाट वञ्चित हुनुपरेको छ । जिल्लामै हुने उपचार लिन अहिले भाडाको गाडी लिएर हजारौं रुपैयाँ खर्चेर राजधानी पुग्नुपर्ने वाध्यता रामेछापबासीको रहेको माझीले बताए ।
यता संघीय सरकार, प्रदेश सरकार र स्थानिय सरकारवाट प्रदान गरिएका भेन्टिलेटर, आइसियु, भिडियो एक्सरे र ल्यावको लागि आवश्यक उपकरणहरु जिल्ला अस्पताल रामेछापलाई प्रदान गरेता पनि उक्त सेवाहरु दक्ष जनशक्तिको अभावमा ठप्प रहेको छ । जिल्ला अस्पताल रामेछापमा हाल सुविधा सम्पन्न भवन, आवश्यक सवै उपकरणहरु भएता पनि आवश्यक जनशक्ति मेडिकल सुुपरिटेन्डन, ल्याव असिस्टेन्ट, स्टाप नर्स लगाएतका कर्मचारी अभावमा भएका सबै उपकरणहरु थन्काएर राखिएको जिल्ला अस्पताल रामेछापका अध्यक्ष रोशन पाख्रीनले जानकारी दिए ।
उनले भने– पहिला रामेछापका नागरिकले उपकरण अभावमा स्वास्थ्य सेवा लिनवाट वञ्चित हुनुपरो । अहिले उपकरण भएपनि दक्ष जनशक्ति नभएका कारण ती उपकरणहरु थन्काएर राख्नपरेको छ । आवश्यक जनशक्ती पठाइदिन प्रदेश र संघीय सरकारलाई पटक–पटक पत्राचार गर्दा समेत अहिलेसम्म जनशक्ती नपठाएका कारण अझै केही समय नागरिकहरुले गुणस्तरीय स्वास्थ्यसेवा पाउन सक्ने अवस्था नरहेको अध्यक्ष पाख्रीनले बताए ।
जिल्लाको एकमात्र सरकारी अस्पतालले नागरिकलाई दिनुपर्ने सेवा सुविधा नदिदा रामेछापवासी मारमा परेका छन् । राज्य जनताप्रति संवेदनशिल नभएकै कारण रामेछापका नागरिकले स्वास्थ्य सेवा लिन हैरानी खेप्नु परेको नेपाल पत्रकार महासंघ रामेछापका अध्यक्ष बद्री नयाँघरेले जानकारी दिए । उनले भने– सरकारले अस्पतालमा प्रयोग हुने सामाग्रीहरु दिएपनि प्रयोग गर्ने जनशक्ति नदिएर नागरिकले पाउने सुविधा वञ्चित गरेको छ । यसवाट के स्पष्ट हुन्छ भने राज्यले जनतालाई स्वास्थ्य सुविधा नदिएर संविधानको वर्खिलाप गरेको सहजै अनुमान लगाउन सकिन्छ ।
