नाम मात्रैको निःशुल्क इन्टरनेट

Uncategorized

रामेछाप । नेपाल दुरसंञ्चार प्राधिकरणले सवै स्थानिय तहहरुमा निःशुल्क इन्टरनेट सुविधा पुर्याउने प्रतिवद्धता जनाएको लामो समय बितिसक्दा पनि रामेछापका स्थानिय तहहरुमा उक्त सेवा पुग्न सकेको छैन् ।
प्राधिकरणले जिल्लाका स्थानिय निकायका वडा कार्यालयहरु, स्वास्थ्य चौकीहरु र सामुदायिक विद्यालयहरुमा निःशुल्क इन्टरनेट सेवा विस्तार गर्ने प्रतिवद्धता जनाएको थियो । तर रामेछापमा भने ती सेवाहरु पुग्न सकेको छैन् । नेपाल दुरसञ्चार प्राधिकरणले रामेछापमा ५१२ केबिस ब्रोडब्याण्ड इन्टरनेट सेवा मार्फत दुई वर्ष भित्र जिल्लाका सवै माध्यमिक विद्यालयहरु, स्वास्थ्य संस्था, नगरपालिका, गाउँपालिका र वडा कार्यालयहरुमा पुर्याउने योजना अघि सारेको थियो ।
नेपाल दुरसञ्चार प्राधिकरणले रामेछापका स्थानिय तहहरु, स्वास्थ्य चौकीहरु र सामुदायिक माध्यमिक विद्यालयहरुमा निःशुल्क इन्टरनेट सेवा जडान गर्न काठमाण्डौंमा रहेको मर्कनटाइन कम्युनिकेशन प्रा.लि.लाई जिम्मेवारी दिएको थियो । उक्त कम्पनिले जिल्लाका सवै स्थानियतह, वडा कार्यालयहरु, सामुदायिक माध्यमिक विद्यालयहरु र स्वास्थ्य चौकीमा निःशुल्क इन्टरनेट सेवा जडान गरिसकेको प्रतिवेदन दुरसञ्चार प्राधिकरणलाई बुझाई सकेको छ तर रामेछापका सवै स्थान उक्त सेवा दुई वर्ष बितिसक्दा पनि पुग्न भने सकेको छैन् ।
दुरसंञ्चार प्राधिकरणले निःशुल्क इन्टरनेट सेवा आफ्नो गाउँपालिका कार्यालय र ६ वटा वडा कार्यालयहरु कही पनि जडान नभएको गोकुलगंगा गाउँपालिकाको कार्यालय रस्नालुका आइटी इन्जिनियर संजय सुनुवारले जानकारी दिए । उनले भने– हाम्रो गाउँपालिका भित्र कुनै पनि वडा कार्यालयमा निःशुल्क इन्टरनेट सेवा जडान भएको छैन् । यदी कोही कसैले निःशुल्क इन्टरनेट सेवा जडान गरेको छ भन्छ भने त्यहो गलत हो ।
प्राधिकरणले निःशुल्क इन्टरनेट सेवा सामुदायिक विद्यालयहरुमा दिन्छ भन्ने सूचना थाहा पाएर पटकपटक इन्टरनेट जडान गरिदिन माग गर्दा समेत विद्यालयले पाउन नसकेको जिल्ला सदरमुकाम मन्थलीमा रहेको मन्थली माध्यमिक विद्यालयका प्रध्यानाध्यापक टंकप्रसाद दाहालले जानकारी दिए । उनले भने– मैले धेरै पटक विद्यालयमा जडान गरिदिनुस भनेर अनुरोध गरे । हाम्रो अनुरोध नत प्राधिकरणले सुन्यो नत कम्पनीमा कार्यरतक कर्मचारीहरुले नै, हाल हामीले मासिक रुपैयाँ तिरेर इन्टरनेट सेवा संचालन गर्दै आएको प्रअ दाहालले बताए ।
यता जिल्लाका सवै स्वास्थ्य चौकीहरुमा समेत इन्टरनेट पुर्याउने प्रतिवद्धता जनाएको नेपाल दुरसंञ्चार प्राधिकरणले स्वास्थ्य चौकीमा समेत उक्त सेवा पुर्याउन सकेको छैन् । जिल्लाका एक÷दुईवटा स्वास्थ्य चौकीमा सेवा पुर्याए पनि जडान गरेको केही दिनवाट नै सेवा वन्द भएपछि अर्को इन्टरनेट जोड्न वाध्य भएका छन् । मन्थली नगरपालिकाको प्राथमिक स्वास्थ्य केन्द्र मन्थलीमा जडान गरिएको निःशूल्क इन्टरनेट सेवा जडान गरेको एक महिना पनि नचलेपछि कार्यालयले पैसा तिरेर छुट्टै नेट कार्यालयमा जडान गरेको मन्थली प्राथमिक स्वास्थ्य केन्द्र मन्थलीका हेल्थ असिस्टेन्ट युवराज सापकोटाले जानकारी दिए ।
जिल्लामा निःशुल्क इन्टरनेट सेवा जडान गर्ने कम्पनीले धेरै स्थानिय तहहरु, वडा कार्यालयहरु, सामुदायिक विद्यालयहरु र स्वास्थ्य चौकीहरुमा जडान नगरेको भन्ने गुनासो पटक–पटक कार्यालयमा पनि आउने गरेको नेपाल टेलिकम मन्थली शाखाका प्रमुख विष्णु भण्डारीले जानकारी दिए । उनले भने– यो नेपाल दुरसञ्चार प्राधिकरणले सिधै प्राइभेट कम्पनि मार्फत काम गराएकाले यस बिषयमा जिल्लामा रहेको टेलिकम कार्यालयमा कुनै जानकारी नै नभएको बताए ।
कम्पनीले जडान गरेका केही स्थानहरुमा जडान भएको केही महिना देखी नै उक्त सेवा वन्द भएको भन्दै कार्यालयमा गुनासो गर्ने र कार्यालयमा धाउनेको संख्या धेरै रहेको नेपाल टेलिकम मन्थली शाखाले जनाएको छ ।
यस वारेमा मर्कनटाइन कम्युनिकेशन प्रा.लि.काठमाण्डौंमा सम्र्पक गर्दा टेक्निकल अफिसर नारद कार्कीले नेपाल दुरसंञ्चार प्राधिकरणले दिएको निर्देशन अनुसार आफ्नो कम्पनीले काम गरेकाले सवै स्थानिय तहहरुसम्म पुग्न नसकेको जानकारी दिए । उनले भने– इन्टरनेट स्लो हुनुमा क्षमता नै कम भएको उपकरण प्रयोग भएकाले एक दुईवटा डेक्सटप कम्प्युटर वाहेक चल्न नसक्ने बताए ।

Facebook Comments Box
ad