मन्थलीमा निःशुल्क आँखा शिविर

प्रदेश ३ समाज स्वास्थ्य

रामेछाप । रामेछापमा आँखाका बिरामीको संख्यामा बृद्धि भएसँगै उनीहरुलाई लक्षित गरी सदरमुकाम मन्थलीमा निःशुल्क दुई दिने आँखा शिविर संञ्चालन गरिएको छ ।

आजबाट शुरु भएकोे उक्त शिविर भोली (शुक्रवार) सम्म संचालन हुने छ । नेपाल नेत्र ज्योती संघ सगरमाथा चौधरी आँखा अस्पताल लहान र मन्थलीमा रहेको सुभम पोलिक्लिनिक एण्ड डाइग्नोष्टिक सेन्टरको आयोजनामा उक्त शिविर संञ्चालन गरिएको हो । शिविरको पहिलो दिन ४० जना मोतीया बिन्दु भएका बिरामीहरुको शल्यक्रिया गरिएको छ । बर्षौदेखी आँखाको समस्या भोग्दै आएकी मन्थली नगरपालिका–१ की ८० बर्षिय नन्दकुमारी सुबेदीले गाउँमै निःशुल्क रुपमा आँखाको उपचार गर्न पाउँदा ज्यादै खुशि लागेको बताइन ।


शिविरको पहिलो दिन आँखा सम्वन्धी समस्या भएका १ सय १० जना बिरामीहरुको आँखा जाँच र आँखाको पावर कम भई नजिक हेर्न समस्या भएका बिरामीहरुलाई पावर चश्मा समेत निःशुल्क रुपमा बितरण गरिएको सुभम पोलिक्लिनिक एण्ड डाईग्नोष्टिक सेन्टरका संचालक डा.केशव धामीले जानकारी दिए ।

उनले भने– पछिल्लो समय दिनप्रतिदिन बढिरहेको प्रदुषण, धुुलो धुवाको कारणले आँखाका बिरामीको संख्या बढिरहेको छ । ग्रामिण भेगका महिलाहरु धुवाँमा धेरै समय बिताउपर्ने भएकाले पनि महिलाहरुमा आँखाको समस्या धेरै हुने गरेको उपचारको क्रममा भेटिएको डा. धामीले बताए ।


भोलीसम्म संचालन हुने उक्त शिविरमा डा.विक्रम श्रेष्ठको नेतृत्वमा आएको स्वास्थ्यकर्मीको टोली संलग्न रहेका छन् भने शिविरको क्याम्प इन्चार्जमा राजकुमार यादव रहेको आयोजक संस्थाले जनाएको छ । आयोजक संस्थाले निःशुल्क रुपमा गरेको सो शिविरमा आँखाका विरामीहरुलाई आँखा जाँच गरी मौकाको फाइदा उठाउन समेत अनुरोध गरेको छ ।


आँखाको समस्या दैनिक रुपमा बढ्दै गएपछि समस्याबाट बच्न धुवाँ, धुलोबाट बच्ने, आँखाको सरसफाई गरिरहनुपर्ने, मोबाइल, टिभी, कम्प्युटर कम प्रयोग गर्न समेत उपचारमा संलग्न चिकित्सकहरुले बताएका छन् ।

Facebook Comments Box