स्थानियतहका प्रमुखहरुलाई शपथग्रहण

प्रदेश ३ समाज संसद

रामेछाप । रामेछाप जिल्लामा रहेका आठ वटै स्थानीय तहमा निर्वाचित नगरपालिका तथा गाउँपालिका प्रमुखहरुले शुक्रबार शपथ ग्रहण गरेका छन् ।

मुख्य निर्वाचन अधिकृतको कार्यालयले शुक्रबार मन्थली नगरपालिकामा आयोजना गरेको कार्यक्रममा जिल्लाका आठ वटै स्थानीय तहका प्रमुख एवं अध्यक्षहरूले शपथग्रहण गरेको छ ।
मुख्य निर्वाचन अधिकृत दिवाकर भट्टको उपस्थितिमा रामेछापका जिल्ला न्यायाधीश बद्रीप्रसाद ओलीले निर्वाचित जनप्रतिनिधिहरुलाई शपथ गराउनुभएको हो ।

शपथ ग्रहण गराउँदै ओलीले दलका प्रतिनिधिले राम्रो काम गर्न नसक्दा दर र आफ्नो पनि भविष्य बरबाद हुने भएकोले त्यसलाई ध्यानमा राखेर काम गर्न जनप्रतिनिधिलाई सुझाव दिनुभयो ।
मुख्य निर्वाचन अधिकृत भट्टले जनप्रतिनिधि नमुना काम गरेको सुन्न र देख्न चाहेको बताउनुभयो । उहाँले सबैको सहयोगले निर्वाचन सफलतापूर्वक सम्पन्न भएको बताउनुभयो ।

कार्यक्रममा बोल्दै नवनिर्वाचित मन्थली नगरपालिका प्रमुख लब श्रेष्ठले सबै दलसँग समन्वय गरी विकासको काममा लाग्ने प्रतिबद्धता व्यक्त गरेका छन् ।
रामेछापका आठ वटा स्थानीय तह मध्ये नेपाली कांग्रेसबाट रामेछाप नगरपालिका प्रमुखमा लवश्री न्यौपाने, गोकुलगंगा गाउँपालिका अध्यक्षमा काजीबहादुर खड्का (दिनेश) र लिखु तामाकोसी गाउँपालिका अध्यक्षमा केशव महत निर्वाचित भएका छन् ।

यसै गरी नेकपा एमालेबाट मन्थली नगरपालिका प्रमुखमा लब श्रेष्ठ, उमाकुण्ड गाउँपालिका अध्यक्ष शेरबहादुर सुनुवार र खाँडादेवी गाउँपालिका अध्यक्षमा ज्ञानकुमार श्रेष्ठ निर्वाचित भएका छन् ।
माओवादी केन्द्रबाट दोरम्बा शैलुङ गाउँपालिका अध्यक्षमा मैनकुमार मोक्तान र सुनापति गाउँपालिका अध्यक्षमा ठुलोकान्छा तामाङ निर्वाचित भएका छन् ।

Facebook Comments Box