रामेछापमा विद्युत सर्ट हुँदा २२ घर जलेर नष्ट

प्रदेश ३ बिशेष समाज

रामेछाप । रामेछाप नगरपालिका–७ सुकाजोर स्थित रजयछाँपमा विद्युत सर्ट भई आगलागी हुँदा एकै गाउँका ११ वटा घर र ११ वटा गोठ गरी २२ वटा घर टहरा जलेर पूर्णरुपमा नष्ट भएका छन् ।

शनिवार दिउँसो स्थानिय विनोद श्रेष्ठको घरमा विद्युत सर्ट भई आगलागी भएको थियो । श्रेष्ठको घरमा लागेको आँगो हावाको कारण नजिकका अन्य छिमेकीहरु चिरन्जीवि श्रेष्ठ, ठेगवहादुर मगर, हिमाल श्रेष्ठ, एकलाल श्रेष्ठ, दलवहादुर मगर, इश्वरलाल श्रेष्ठ, तेजवहादुर श्रेष्ठ, धनवहादुर श्रेष्ठ, शंकर श्रेष्ठ र प्रेम कुमार श्रेष्ठ लगाएतका ११ वटा घरहरु र ११ वटा गोठहरु पूर्ण रुपमा जलेर नष्ट भएको जिल्ला प्रहरी कार्यालय रामेछापका प्रहरी नायव उपरीक्षक राजकुमार थिङले जानकारी दिए ।

उनले भने– दिउँसो देखी लागेको आगो नेपाली सेना, शसस्त्र प्रहरी, नेपाल प्रहरी र स्थानिय नागरिकहरुको प्रयासमा ५ घण्टापछि नियन्त्रणमा आएको छ । उक्त स्थानमा घरहरु एक आपसमा टाढा रहेपनि अत्याधिक मात्रामा लागेको हावाका कारण आगोको लप्का टाढासम्म गएका कारण अन्य घरहरुमा पनि आगो लागेको देखिन्छ ।

आगो नियन्त्रणमा आएपनि ११ वटा घरमा रहेका नागरिकहरु सुरक्षीत रहेका छन् । आगलागीमा परी घरमा रहेको नगद, अन्नपात, लत्ता कपडा, भाडाकुडा लगाएतका सम्पूर्ण सामाग्रीहरु जलेर पूर्णरुपमा नष्ट भएको छ । दिउँसो देखी लागेको आँगो पुरै नियन्त्रणमा आएता पनि कती क्षती भयो भन्ने एकिन तथ्याङक आउन केही दिन लाग्ने पनि प्रहरी नायव उपरीक्षक थिङले बताए ।

अहिले उक्त स्थानमा नेपाली सेना, नेपाल प्रहरी र स्थानिय नागरिकहरु मिलेर अस्थायी टहरा निमार्ण गर्ने क्रम जारी रहेको रामेछाप नगरपालिका–७ सुकाजोरका वडा अध्यक्ष समिर कार्कीले जानकारी दिए । उनले भने– घर विहिन भएका नागरिकहरुलाई अस्थायी रुपमा वसोसा गर्न अस्थायी टहरा निमार्णको काम भइरहेको र उनीहरुलाई तत्काल खाद्यान्न र लत्ता कपडा नेपाली सेना र रामेछाप नगरपालिकावाट व्यवस्थापन गर्ने काम भएको छ ।

आगलागीमा परेका नागरिकलाई रामेछाप नगरपालिकाले खाद्यान्न, ओड्ने र ओछ्याउने म्याट, भाडाँकुडा लगाएतका सामाग्रीहरु लिएर घटनास्थल तर्फ आफु लागेको रामेछाप नगरपालिकाका उप–प्रमुख सिजृना खड्काले जानकारी दिइन ।

Facebook Comments Box