ट्राफिक व्यबस्थापन नहुँदा भद्रगोल

प्रदेश ३ समाज

रामेछाप । सदरमुकाम मन्थलीको व्यस्त वजारमा ट्राफिक व्यवस्थापन नहुँदा दैनिक अस्तव्यस्त र भद्रगोल बढ्दै गएको छ ।

ट्राफिक व्यवस्थापन फितलो हुँदा मन्थली वजारको सडक अस्तव्यस्त वन्दै गएको हो । पटकै पिच्छे ट्राफिक प्रहरी प्रमुख फेरिदा उनीहरुले गर्ने काम फरक–फरक हुँदा सवारी चलाउने चालक र यात्रु दुवै मारमा पर्दै आएका छन् । वजारमा कहिले मोटरसाइकल पार्किङ गर्न दिने र कहिले प्रहरीले रोकी राखेको मोटरसाइकलको हेलमेट लगिदिने र त्यही अनुसार जरिवाना गर्ने गर्दा सवारीसाधन चलाउने चालकहरु मारमा पर्दै आएका हुन् ।

यतिमात्रै हैन साँघुरो सडकमा जताततै सवारीसाधनलाई पार्किङ्ग गर्न दिने, मालवाहक गाडीवाट जतिखेर पनि सामान लोड अनलोड गर्दा पनि ट्राफिक प्रहरीले त्यसतर्फ ध्यान दिननसक्दा जुनसुकै समयमा पनि दुर्घटना हुन सक्ने स्थानियहरुले गुनासो गर्दै आएका छन् । व्यस्त सडकको विचबिचमा सवारीसाधन पार्किङ्ग गर्दा सडमा गुड्ने अन्य सवारीसाधनले कुरेर बस्नुपर्ने अवस्था सिर्जना भएको छ ।

एकातिर साँघुरो सडक, अर्कोतीर जताततै ठूला मालबाहक सवारीसाधन र यात्रुवाहक वस सडकमै पार्किङ्ग गरिदिदा साना सवारीसाधन गुडन सक्ने अवस्था नभएको मन्थली नगरपालिका–१ का सुकदेव सार्कीले बताए । उनले भने– सडकमा मनलाग्दी रुपमा ठूला सवारीसाधनले वाटो ढाकेका छन् । मनलाग्दी रुपमा पार्किङ्ग गरिदिएपछि वजार क्षेत्रमा सवारीसाधन चलाउन धेरै समस्या हुने गरेको छ । जिल्लाको ट्राफिक व्यवस्थापन गर्ने जिम्मेवार निकाय जिल्ला ट्राफिक प्रहरी कार्यालयको वेवास्ताको कारण मन्थली वजार अस्तव्यस्त बन्दै गएको सुकदेवले    बताए ।


केही वर्षअघि जिल्ला प्रसासन कार्यालयमा बसेको यातायात व्यवसायीहरु सहितको सर्वदलिय वैठकले विद्यालय र कार्यालय समयमा ठूला मालवाहक सवारीसाधन र यात्रुवाहक बस वजार क्षेत्रमा पारर्किङ्ग र सामान लोड अनलोड गर्न नदिने निर्णय भएको थियो । प्रशासनमा भएको उक्त निर्णय केही समय लागु भएता पनि अहिले ती पहिला भएका सवै निर्णयहरु कार्यान्वयन हुन सकेका छैनन् ।

सडकमा जताजतै सवारीसाधन पार्किङ्ग हुन थालेपछि विद्यालयको समयमा पैदल हिडेर विद्यालय जाने स–साना वालवालिका र पैदल यात्रुहरुले हैरानी व्यहोर्दै आएका छन् । विद्यालय समयमा पैदल हिडेर विद्यालय गएका वालबालिकाहरु बेलुका घर सकसुल आउँछन् वा आउँदैनन् भन्ने चिन्ता अभिभावकहरुले लिएर वस्नुपर्ने अवस्था भएको छ । सडकको ठाउँठाउँमा जेव्राक्रस राखिएको भएता पनि ती जेव्राक्रसमै सवारीसाधन रोकेर राख्दा समेत ट्राफिक प्रहरीले वास्ता नगरेको मन्थली नगरपालिका–३ ठुलीमदौका टिकाराम दमाईले जानकारी दिए ।

उनले भने– तल्लो सडकको छेउछेउ जाँउ दुईतर्फी पैदल हिड्ने वाटो छैन् । मास्लो सडकको पेटीतर्फ जाउँ सडक पार गर्दागर्दै सडकमा हुइकिएका सवारीसाधनले किचेर मार्ला भन्ने डर । सडकमा राखिएको जेब्राक्रसवाट सडक पार गरौं भन्दा त्यही जेब्राक्रसमा सवारीसाधन चालकहरुले रोकेर राख्दा पनि ट्राफिक प्रहरी रमिते बनेर बसेको देख्दा आफुलाई अच्चम लागेको टीकारामले बताए ।


यसअघि मन्थली बजारमा एकतर्फी सडक संचालन हुँदै आएको थियो । एकतर्फी सडक संचालन हुँदा रेडक्रस लाइनका व्यवसायीहरुले थोरे भएपनि राहातको महसुस गरेका थिए । पछि ट्राफिक प्रहरीले लत्तो छाडेपछि एकतर्फी सडक पुनः दुईतर्फी भएको छ । जसका कारण रेडक्रस लाइनका व्यवसायीहरु मारमा पर्दै आएका छन् ।

त्यसैगरी मन्थली नगरपालिका र वडा नं १ मन्थली कार्यालयको आर्थिक सहयोगमा जिल्ला ट्राफिक प्रहरी कार्यालयले मुख्य वजार क्षेत्रमा राखिएको गति सिमितका होडिङ्ग बोर्डहरु अहिले कहाँ छन् टुङ्गो समेत छैन् । वजारमा राखिएको ती होडिङ्ग बोर्डहरु हटाएपछि सवारीसाधन चलाउने चालकहरुको लापरर्वाही बढ्दै गएको स्थानियहरु बताउँछन् ।

Facebook Comments Box