दुई अध्यक्षले भाडा नतिर्दा गैससमा ताला

अर्थ प्रदेश ३ समाज

रामेछाप । घर भाडामा लिएर कार्यालय संचालन गर्दै आएको गैर सरकारी संस्था महासंघ नेपाल रामेछापका दुई अध्यक्षहरुले घरधनीलाई तिर्नुपर्ने डेढ वर्षदेखीको घरभाडा रकम नतिरेपछि घरधनीले संस्थाको कार्यालयमा ताला लगाइदिएका छन् ।

संस्थाको पूर्व अध्यक्ष मिलनकुमार घिसिङको कार्यकालमा २०७५ साल कार्तिक मसान्तसम्मको ३९ हजार रुपैयाँ र बर्तमान अध्यक्ष भुवनकुमार श्रेष्ठको कार्यकाल अन्तर्गत २०७५ साल मंसिर महिना देखी २०७८ साल माघ मसान्तसम्मको १ लाख १७ हजार गरी कुल १ लाख ५६ हजार रुपैयाँ घर भाडा तिर्न बाँकी रहेको घरधनी रमेश ढुंगेलले जानकारी दिए ।

उनले भने– गैससका दुई कार्यकालका अध्यक्षलाई घरभाडाको रकम पटक–पटक माग्दा पनि भाडा नदिएपछि आफुले वाध्य भएर संस्थाको कार्यालयमा थप ताल्चा लगाएको छु । जहिलेसम्म संस्थाले भाडा भुक्तानी गर्दैन त्यसवेलासम्म संस्थामा लगाएको ताल्चा आफुले नखोल्ने घरधनी ढुंगेलले बताए ।


जिल्लाका विभिन्न संस्थाहरुको माउ संस्था गैर सरकारी महासंघमा तीन महिना देखी कार्यालयमा ताल्चा लगाएपछि अहिले संस्थामार्फत हुने सबै कामहरु ठप्प रहेका छन् । सहकारी संस्था नविकरणको जिल्ला प्रशासन कार्यालयले अनिवार्य रुपमा गैर सरकारी संस्थाको सिफारिस पत्र माग गर्ने गरेको छ । यता गैर सरकारी संस्थाको कार्यालयमा ताला लागेपछि सिफारिस लिन समस्या झेल्नु परेको विभिन्न संस्थाका पदाधिकारीहरुले गुनासो गरेका छन् ।

गैससले अन्य संस्थालाई दिने सेवा नपाएको र कार्यालयमा घरधनीले ताल्चा लगाएको बिषयमा गैर सरकारी संस्था महासंघ रामेछापका अध्यक्ष भुवनकुमार श्रेष्ठ सँग सम्र्पक गर्दा उनले एक÷दुई दिन भित्रै घरधनीको भाडा बुझाउने र कार्यालय नियमित खुलाएर सेवा आरम्भ गर्ने गरी संस्थाका पदाधिकारीहरु सँग छलफल भइसकेको बताए ।

उनले भने– अहिले संस्थामा कर्मचारी नभएकाले संस्थाको काम मदन आश्रीत चोकमा रहेको गम्भिर विकको पसलवाट काम भइरहेको छ । संस्थामा नविकरण सिफारिस वापतको केही रकम उठेको छ । घरभाडा तिर्न अपुग रकम संस्थाका पदाधिकारीहरुसँग २÷४ हजार रुपैयाँ उठाएर भएपनि घरधनीलाई बुझाउने तयारीमा आफु लागी परेको अध्यक्ष श्रेष्ठले बताए ।


गैर सरकारी संस्था महासंघले घरभाडा वापतको रकम मात्रै हैन सो संस्थामा कार्यरत कर्मचारीहरुलाई समेत तलव भत्ता नदिएको उक्त संस्थामा कार्यरत एक कर्मचारीले आफ्नो नाम नछाप्ने सर्तमा बताइन । उनले भनिन्– धेरै महिना गैससमा बसेर काम गरे । तर आफुले पाउनु पर्ने तलव भत्ताको रकम अहिलेसम्म पाउन सकेको छैन् । संस्थाका पदाधिकारीहरुसँग पटक–पटक रकम माग गर्दा समेत हुन्छ हुन्छ भन्दै टारेको ती कर्मचारीले बताइन ।

Facebook Comments Box