समाजसेवि नेता गौतम केन्द्रीय सदस्य पदमा उम्मेदवारी दिदै

प्रदेश ३ राजनीति

रामेछाप । नेकपा एमाले रामेछापका समाजसेबी एवं दानवीर नेता रत्नप्रसाद गौतमले पार्टीको १० औं राष्ट्रिय महाधिबेशनमा केन्द्रीय सदस्यमा उम्मेदवारी दिने घोषणा गरेका छन् ।

यही मंसिर १० देखी १२ गतेसम्म चितवनमा हुने नेकपा एमालेको दशौं राष्ट्रिय महाधिवेशनमा समाजसेबी नेता गौतमले बागमती प्रदेशको भूूगोलतर्फबाट खुल्ला केन्द्रिय सदस्यमा आफुले उम्मेदवारी दिने र यो अभियानमा साथ र सहयोग गरिदिन आम मतदाताहरुलाई उनले आग्रह समेत गरेका छन् ।

नेकपा एमाले रामेछापको जिल्ला समिति सदस्य तथा नेकपा एमाले रामेछापको १० नं इलाका इन्चार्ज समेत रहेर काम गरिसकेका नेता गौतम रामेछाप जिल्लाभित्र नेकपा एमालेको प्रभावशाली नेताको रुपमा चिनिन्छन् । नेता गौतम पार्टीमा मात्रै नभएर जिल्लामा हुने हरेक सामाजिक कार्यमा समेत उत्तिकै सहयोगी, मनकारीकारी र दानवीरको रुपमा चिरपरिचित व्यक्ति हुन् ।

नेता गौतमले जिल्लाका हरेक गाउँवस्तीमा पुगेर पार्टीको संगठनलाई उत्तिकै चलाएमान बनाउँदै आएका छन् । संगठन नै पार्टीको मुख्य कडी हो भन्ने हेतुले उनले गाउँमा हुने हरेक कार्यक्रममा पुग्ने संगठन विस्तारमा जोड दिने व्यक्तिको रुपमा नेकपा एमाले भित्र नेता गौतम चिनिन्छन् । त्यसैगरी पार्टीको संगठनको लागि हरेक वर्ष आर्थिक सहयोग प्रदान गर्दै आएका नेता गौतम यसपटक भने पार्टीको केन्द्रीय सदस्यमा उम्मेदवारी दिने तयारीमा जुटेका हुन् ।

पार्टी र संगठनको लागि जति नेता गौतम लाग्दछन् त्यो भन्दा बढी उनी समाजसेवामा पनि उत्तिकै लाग्ने गरेका छन् । जिल्लाको दुरदराजमा हुने विभिन्न घटनामा गम्भिर प्रकृतीका विरामीहरु र आर्थिक अवस्था कमजोर भएका व्यक्तिलाई उनले निःशुल्क रुपमा हेलिकोप्टर मार्फत उद्धार गरि राजधानीका अस्पतालसम्म पुरयाईदिने र उपचारमा सहयोग समेत गर्दै आएका छन् । त्यस्तै जिल्लामा हुने हरेक सामाजिक कार्यमा उत्तिकै सहयोग गरेर नेता गौतमले आम रामेछापेली नागरिकहरुको मन जित्न सफल भएका छन् ।

जिल्लामा हुने ठूलाठूला विपदको समयमा नेता गौतमले हरेक वस्तीवस्तीमा पुगेर पिडीत नागरिकहरुलाई आर्थिक सहयोग गर्दै आएका छन् । २०७२ सालमा गएको विनासकारी भुकम्प होस्, वर्षादका कारण घरवार बिहिन भएका नागरिकहरुलाई होस्, विश्वभर फैलिएको कोरोना महामारीको समयमा होस् वा अन्य घटनामा नेता गौतमले सहयोग गर्दै आएका छन् । यता जिल्लामा अस्पताल निमार्ण, मठमन्दिर, गुम्वा, चौतारो, पानी पधेँरा लगाएतमा पनि गौतम नेताले व्यक्तिगत रुपमा नागरिकहरुलाई सहयोग प्रदान गर्दै आएका छन् ।

समग्र जिल्लाको विकास निमार्ण र समृद्धिको लागि पार्टी भित्र आफुले केन्द्रिय सदस्यमा उम्मेदवारी दिएको नेता गौतमले जानकारी दिए । रामेछापमा नेता गौतम जस्तो नेता पार्टी भित्र कमै भएकाले जसरी भएपनि गौतमलाई केन्द्रीय सदस्य पदमा निर्वाचित गराउन आम मतदाताहरुलाई आग्रह गरिएको नेकपा एमाले रामेछापका नेता रामबाबु घिमिरेले जानकारी दिए ।

Facebook Comments Box
ad