मन्थली माबिकाे छानबिन प्रतिबेदन पालिकामै गुपचुप

अर्थ प्रदेश ३ शिक्षा समाज

रामेछाप । सदरमुकाम मन्थलीमा रहेको जिल्लाकै नमुना बिद्यालयको रुपमा चिनिएको मन्थली माध्यमिक विद्यालयमा भएको अनियमितताको बिषयमा परेको उजुरी उपर गठित छानबिन समितिको प्रतिवेदन मन्थली नगरपालिकाले गुपचुप अवस्थामा राखेको आरोप उजुरीकर्ताले लगाएका छन् ।

मन्थली माध्यमिक विद्यालयका शिक्षक र विद्यालय व्यवस्थापन समितिका पदाधिकारीहरुको मिलोमतोमा व्यापक रुपमा आर्थिक अनियमिता भएको भन्दै मन्थली नगरपालिका वडा नं १ का पाण्डब प्रसाद सुबेदीले मन्थली नगर शिक्षा समितिमा उजुरी पेश गरेका थिए । उनले पेश गरेको उजुरीमा विद्यालय परिसरमा निमार्णाधिन ७४ लाखको छात्रावास भवन बिना टेण्डर विद्यालयका प्रध्यानध्यापक र विद्यालय व्यवस्थापन समितिका अध्यक्ष लगाएतका पदाधिकारीले आफुखुशी भवन निमार्ण गरि आर्थिक अपचलन गरेको आरोप लगाएका छन् ।

त्यसैगरी सुबेदीले दिएको उजुरीमा विद्यालय व्यवस्थापन समिति गठन गर्दा शिक्षा ऐन विपरित गठन गरेको, विद्यार्थी भर्नाको नाममा अभिभावकसँग रकम असुली गरेको, निजी श्रोत र अन्य शिक्षक कर्मचारी भर्ना गर्दा व्यवस्थापन समितिको निर्णय र सूचना बिनानै भर्ना गरिएको, सार्वजनिक विदाका दिनमा पनि विद्यालयको सबारीसाधन प्रयोग गरि आर्थिक अपचलन गरेको लगाएतका बिषयमा छानविन गरि दोषी उपर कारवाहीको माग गर्दै उजुरी दिएका थिए ।


मन्थली नगरपालिका शिक्षा शाखामा परेको उजुरी उपर तत्कालै पालिकाले नगर शिक्षा समिति मार्फत कानुन अधिकृत सुर्दशन रायको संयोजकत्वमा ५ सदस्यिय स्थलगत छानबिन समिति गठन गरि सत्यतथ्य छानबिन गर्नेगरि कामको जिम्मा दिएको थियो । गठित समितिले मन्थली माध्यमिक विद्यालयमा भएको अनियमितताको बिषयमा सत्यतथ्य छानबिन गरि एकहप्ता अघि नै मन्थली नगरपालिकालाई प्रतिवेदन बुझाइसकिएको स्थलगत छानविन समितिका संयोजक सुर्दशन रायले जानकारी दिए ।

उनले भने– मन्थली नगरपालिकाको नगर शिक्षा समितिले दिएको कामको जिम्मेवारी पुरा गरी हामीले नगर शिक्षामा प्रतिवेदन वुझाइसकेका छौं । उक्त बुझाएको प्रतिवेदनमा मन्थली माध्यमिक विद्यालयमा भएको सबै अनियमितता लगाएतका बिषयमा स्पष्ट हुने गरि खुलाइएको छ । हामीले बुझाएको प्रतिवेदन मन्थली नगरपालिकाले सार्वजनिक गर्छ वा गर्दैन यो बिषयमा हामीले बोल्न नमिल्ने संयोजक रायले बताए ।


मन्थली माविको उजुरी पछि स्थलगत छानविन समितिले बुझाएको प्रतिवेदन मन्थली नगरपालिकाले अझै सार्वजनिक गरेको छैन । यस बिषयमा मन्थली नगरपालिकाका प्रमुख प्रशासकिय अधिकृत लिलाराज पौडेलसँग सम्र्पक गर्दा उनले भने– मन्थली नगरपालिकाले शुक्रवार नगर शिक्षाको बैठक बोलाएर प्रतिवेदनको बिषयमा छलफलसम्म भएको छ । बैठकमा सहभागीहरुले स्थलगत छानविन समितिले बुझाएको प्रतिवेदन अध्ययन गर्न पाउनु पर्ने अडान राखेपछि एक÷एक प्रति हामीले दिएका छौं । अब पालिकाले चाडै पुनः नगर शिक्षा समितिको बैठक राखेर प्रतिवेदन सार्वजनिक गर्ने नगर्ने भन्ने बिषयमा टुङ्गो लाग्ला ।

यता उजुरी कर्ता पाण्डब सुबेदीले भने स्थलगत छानविन समितिले बुझाएको प्रतिवेदन नगर शिक्षा समितिले लुकाएको आरोप लगाएका छन् । उनले पटक–पटक छानविन समितिले बुझाएको प्रतिवेदन सार्वजनिक गर्न माग गरेको भएता पनि पालिकाले अहिलेसम्म सार्वजनिक नगर्नु दुःखद कुरा भएको बताए ।

Facebook Comments Box
ad