भान्सा घरमा राखेर बिरामीको आँखा जाँच

प्रदेश ३ समाज स्वास्थ्य

रामेछाप । जिल्लामा रहेको एकमात्र जिल्ला सामुदायिक आँखा केन्द्रको भवनमा पहिरोले क्षती पुर्याएर भवन अभाव भएपछि स्वास्थ्यकर्मीले भान्सा घरमा राखेर विरामीको आँखाको उपचार गर्न लागेका    छन् ।

यहीँ भदौ १३ गते परेको अविरल वर्षाका कारण जिल्ला सामुदायिक आँखा केन्द्रको भवन भएको स्थानमा माथिल्लो भित्तातर्फवाट आएको पहिरोले भवनमा क्षती पुर्याएपछि आँखा जाँचको सेवा बन्द गरिएको थियो । भवन अभावमा आँखा जाँच गर्न आउने विरामीहरु राखेर उपचार गर्ने ठाउँ नभएपछि उक्त सेवा हाल भान्साको लागि बनाइएको एक कोठो प्रिफ्याव भवनबाट उपचार सेवा मंगलवार वाट शुरुवात गरिएको तामाकोशी अस्पतालका अध्यक्ष गोबिन्दप्रसाद घिमिरेले जानकारी दिए ।

उनले भने– भएको भवन पहिरोले क्षती पुग्यो । अर्को भवन तत्काल बन्ने अवस्था छैन् । अस्पतालले गर्दा अन्यत्र कोठाको अभाव छ । टाढाटाढा बाट आँखाको उपचार लिन आउने विरामीहरुलाई उपचार बिना नै फर्काउनु भन्दा उपचार गरेर पठाउनु राम्रो भएकाले तत्कालको लागि भान्सा तथा चमेना गृहको लागि निमार्ण गरिएको एककोठे भवनवाट आँखा जाँचको नियमति सेवा शुरुवात गरिएको घिमिरेले बताए ।


तामाकोशी अस्पतालमा आँखा जाँच गराउन आउनेको संख्या अत्याधिक मात्रामा बढ्दै गएपछि स्व.जगदिश प्रसाद घिमिरेको पहलमा २०५७ सालमा तिलगंगा आँखा अस्पताल काठमाण्डौंको सहयोगमा तामाकोशी अस्पछताल परिसरमा रामेछापमा सामुदायिक आँखा केन्द्रको स्थापना भएको थियो । तिलगंगा आँखा अस्पतालले केही वर्ष अघि मात्रै ५० लाखको लागतमा प्रिफ्याव भवन निमार्ण गरि त्यहीँ भवनवाट आफ्नो सेवा आरम्भ गर्दै आएको थियो ।

सामुदायिक आँखा केन्द्रमा अहिले रामेछापको अलावा दोलखा, सिन्धुली, ओखलढुङ्गा र सोलु लगाएतका जिल्लाहरुवाट समेत आँखा जाँच गराउन विरामीहरु आउने गरेका छन् । यस आँखा केन्द्र मार्फत जिल्लामा हालसम्म ४ हजार जनाको मोतियाविन्दुको शल्यक्रिया गरिएको जिल्ला सामुदायिक आँखा केन्द्रका इन्चार्ज उमेश तामाङले जानकारी दिए ।

उनले भने– अहिले पनि दैनिक झण्डै ३५ देखी ४० जनासम्मको हाराहारीमा आँखाका विरामीहरु उपचार लिन आउने गरेका छन् । आँखाको जाँच गर्न धेरै टाढाटाढा देखी बृद्धबृद्धाहरु बढी मात्रामा आउने भएकाले उहाँहरुलाई जसरी भएपछि उपचार गराएर पठाउनकै लागि दुःख जिलोका साथ सेवा पुनः सुचारु गरेका छौं ।


पहिरोले क्षती पुगेको भवनको निरिक्षणको लागि तिलगंगा आँखा अस्पतालवाट प्राविधिक सहितको टोली रामेछाप आउने भएका छन् । तिलगंगावाट आएको टोलीले निरिक्षण गरे पश्चात मात्रै भवन वरपर पुरिएको माटो हटाउने र नयाँ भवन कहाँ निमार्ण गर्ने भन्ने बिषयमा छलफल भएपछि मात्रै भवन निमार्णको कामलाई अघि वढाइने तामाकोशी अस्पतालका सचिव हिमाल ढुंगेलले जानकारी दिए ।

Facebook Comments Box
ad