लकडाउनका कारण दूध किसान मारमा

कृषि

सन्तोष ढुङ्गेल
बैशाख , २४ रामेछाप
कोरोना भाइरसको नयाँ भेरियन्ट सहितको भाइसरका कारण सुरु भएको निषेधाज्ञाको कारण रामेछापका दूध किसान मारमा परेका छन् । बिहान एक समय मात्र बजार पसल खुल्ले हुँदा किसानहरुले उत्पादन गरेको बेलुकाको दूध बजार बन्द हुँदा खेर जाने स्थितिमा पुगेको छ ।
व्यवसायीक रुपमा दूध उत्पादन गर्दै आएका किसानहरु यसको प्रत्यक्ष मार खेपिरहेका छन । आफुहरुले उत्पादन गरेको दूध बिहानको डेरिले लिने तर बेलुका लिन नमानेपछि किसानहरू चिन्तित बनेका हुन् । बिहानको दूध मात्र डेरिले लिन्छन् बेलुकाको दूध के गर्ने भन्ने चिन्ताले सताएको दूध किसान डुकुना पोखरेल घिमिरे बताउछिन् ।
निरञ्जन निराकार गाई फार्म संचालन गर्दै आएकी उनी किसानले उत्पादन गरेको दूध डेरीहरुले लिने वातावरण सम्बन्धि निकायले मिलाइदिनु पर्ने बताउछिन् । आफै दुग्ध सहाकारी रामेछापको अध्यक्ष हुँदा पनि किसानले उत्पादन गरेको दूध खपत नहुदा चिन्तित भएको घिमिरे बताउछिन् । किसानले उत्पादन गरेको दूध बिक्री गर्ने वातावरण प्रशासनले मिलाइदिनु पने अर्का किसान केशर क्षेत्री बताउछन् ।
दैनिक १ सय ३० लिटर उत्पादन गर्दै आएका उनको पनि बेलुकाको दूधले बजार नपाउँदा आफू निरास भएको बताउछन् । दूध बिक्री नहुँदा गाईलाई घाँस र दाना खुवाउन समेत समस्या हुन थालेको खत्रीले बताए । आनन्द पशु पालन फार्मका मार्फत खत्रीले १३ वटा गाई पालेका छन् । आफुहरुले उत्पादन गरेको दूध भणडारण गर्न सक्ने अवस्था नरहेको र डेरीहरुले नलिदिए पछि आफुहरु समस्यामा परेको उनले बताए ।
लकडाउनको कारण खपत कम भए सगैं किसानहरुले उत्पादन गरेको दूध लिन नसकेको डेरी संचालक बताउँछन् । दूध लिएर मात्र के गर्ने किन्ने मान्छे नआएपछि र आफुहरुले भण्डारण धेरै गर्न नसकेका कारण यो अबस्था आएको रामेछाप डेरीका संचालक किशोर पौडेल बताउँछन् । प्रशासनले डेरी ब्यबसायलाई सहज संचालन गर्ने वातावरण बनाइदिनु पर्ने पौडेल बताउँछन् ।
अहिले मन्थली आसपासका किसानले उत्पादन गरेको दूधको मात्रा १९ सय लिटर रहेको छ भने बजारमा खपत ६ सय लिटर मात्र रहेको छ । प्रशासनले दूध तथा दूधजन्य पदार्थको उत्पादन तथा बजारीकरणमा सहजता साथै ढुवानीमा सहजीकरण गरिदिए किसानहरूले उत्पादन गरेको सम्पुर्ण दूध लिन सकिने चिरञ्जीवी डेरीका संचालक भानु श्रेष्ठ बताउँछन् । प्रशासनले डेरी उद्योगलाई अन्य ब्यबसाय जस्तै समय निर्धारण गरेका कारण किसानले समस्या बेहोर्नु परेको उनको भनाइ छ । डेरी उद्योगलाई दैनिक १२ देखि १५ घण्टा संचालन गर्न दिनु पर्ने उनको भनाइ छ । जिल्ला प्रशासन कार्यालयले भने किसानको समस्या समाधान गर्न आवश्यक ब्यबस्था गरिने जनाएको छ ।

Facebook Comments Box
ad