खिम्तीमा व्यवसायिक माछा पालन

अर्थ कृषि

रामेछाप । लिखु तामाकोशी गाउँपालिका ६ खिम्तीमा पहिलो पटक माझी समुदायले आईपिएम कृषि समुह गठन सँगै व्यवसायिक रुपमा पोखरी निमार्ण गरी माछापालनको शुरुवात गरेका छन् ।
परम्परागत रुपमा कोशी किनारमा वसोवास गर्ने माझी जातीहरुले यसअघि व्यवसायिक रुपमा नभई तामाकोशी र खिम्ती खोलामा माछा मार्ने र जिवीका चलाउने गर्दथे । सडक विस्तार सँगै अहिले गाउँमा विभिन्न चेतनाका कार्यक्रमहरु सँगै विभिन्न तालीमहरु पाएपछि माझी समुदायमा परम्परागत रुपमा गर्दै आएको पेशालाई परिमार्जन गरी समुहगत रुपमा माछापालनको शुरुवात गरेका हुन ।
खिम्तीखोला किनार छेउको ३ रोपनी जग्गामा करीव ३ लाख रुपैयाँ खर्चेर दुईवटा पोखरी निमार्ण गरी गतवर्षदेखी व्यवसायिक रुपमा माछापालनको शुरुवात गरेका माझी समुदायले पहिलो वर्षमा माछा विक्री गरेर ९० हजार रुपैयाँ कमाउन सफल भएका थिए । गतवर्ष वजारको माग अत्यन्त वढी आएकाले यसवर्ष १ हजार ५ सय माछाका भुरा जनकपुरवाट ल्याएर पोखरीमा छोडेका छन् ।
अहिले उक्त पोखरीमा कमन, सिलवर र बिगेट जातको माछाका भुरा ल्याएर पोखरीमा राखेकाले गतवर्षको अनुपातमा यसवर्ष कमाई धेरै हुने आशा आफुले लिएको स्थानिय पूर्णवहादुर माझीले वताए । उनले भने माछापोखरी देखेपछि माछा किन्न दैनिक उपभोक्ताहरु आउँछन् तर माग अनुसार माछा पुरयाउन सकेका छैनौं । अहिले खिम्ती वेशीमा मात्र दैनिक ३० केजीसम्म दैनिक माछाको माग हुने गरेको छ ।

Facebook Comments Box
ad