किर्ते लालपूर्जा बनाएर जग्गा बेच्ने रामेछाप गेलुका बुढाथोकी सहित नौ पक्राउ

अर्थ प्रदेश ३

रामेछाप । नक्कली नागरिकता र जग्गाको लालपूर्जा बनाएर म्याग्दीकी मीना खड्काको नाममा रहेको काठमाण्डौंको जग्गा बेचेको उजुरीको आधारमा मन्थली नगरपालिका वडा नं–११ का बालकृष्ण बुढाथोकी सहित नौ जनालाई प्रहरीले पक्राउ गरेको छ ।
म्याग्दी घर भई हाल बेल्जियममा बस्दै आएकी मीना खड्काको नक्कली नागरिकता र जग्गाधनी पूर्जा बनाएर उनको नाममा रहेको थानकोटको २० आना जग्गा बिक्री गरेको आरोपमा प्रहरीले नौ जनालाई पक्राउ गरेको हो । नक्कली कागजात बनाएर अर्काको नामको जग्गा विक्री गरेको उजुरीको आधारमा यसअघि नै प्रहरीले केही व्यक्तिलाई प्रक्राउ गरिसकेको र थप नौजनालाई अहिले पक्राउ गरिएको महानगरीय प्रहरी परिसर काठमाण्डौंले जनाएको छ ।
किर्ते कागजात बनाई अर्काको नाममा रहेको जग्गा विक्री गरेको उजुरीको आधारमा प्रहरीले काठमाण्डौंका बुढानीलकण्ठ नगरपालिका–११ का बस्ने ४७ वर्षीय विजयकुमार खड्का, धादिङ नीलकण्ड नगरपालिका पतेनी घर भई हाल चितवनको राप्ती नगरपालिका–२ पिप्ले बस्ने बालप्रसाद भट्ट, काभ्रेको पनौती नगरपालिका–४ का रामचन्द्र पुडासैनी भनिने पुुण्डेप्रसाद काफ्ले, संखुवासभा नूनढाकी गाउँपालिका–६ घरभई हाल ललितपुर महानगरपालिका–१८ भैंसेपाटी वस्ने ६३ वर्षिय इन्द्रबहादुर खत्री भनिने इन्द्रबहादुर घले, सिन्धुपाल्चोकको ठूलोधादिङ घर भई काठमाण्डौंको गोकर्णेश्वर नगरपालिका–६ बस्ने लक्ष्मी घतानी रहेका छन् ।
त्यसैगरी प्रहरीले ओखलढुंगाको खिजीदेम्बा गाउँपालिका–१ घरभई हाल काठमाण्डौंका महानरपालिका–६ बौद्ध बस्ने ४६ वर्षीय विजयप्रकाश सुनुवार, सिन्धुलीको कमलामाई नगरपालिका–५ घरभई हाल काठमाण्डौं महानगरपालिका–१० बानेश्वर बस्ने कृष्ण थापामगर भनिने कृष्णबहादुर दर्लामी र झापाको बचनकवल गाउँपालिका–३ घरभई हाल ललितपुरको महालक्ष्मी नगरपालिका बस्ने वर्ष ४५ का कृष्णबहादुर कटुवाललाई पनि प्रहरीले पक्राउ गरेको जनाएको छ ।
पक्राउ परेकाहरुले कीर्ते लालपूर्जा बनाएर जग्ग्गा बिक्री गर्ने सिलसिलामा मीना खड्काको ठाउँमा लक्ष्मी घतानीको नाम राखेका थिए । उनीहरुले बनाएको नक्कली जग्गाधनी पूर्जामा मीना खड्काको नाम राखी फोटो भने लक्ष्मी घतानीको राखेको भेटिएको छ । सो जग्गा उनीहरुले भक्तपुरको मध्यपुर थिमी नगरपालिका–४ का कृष्णगोपाल श्रेष्ठ, रत्नकेशरी माका श्रेष्ठ, कृष्णभक्त माका श्रेष्ठ र बिजयलक्ष्मी श्रेष्ठलाई बेचेर ७२ लाख रुपैयाँ ठगि गरेको फेला परेको छ ।


यसैगरी उनीहरुले सोही जग्गा काभ्रेको धुुलिखेल बस्ने कुमार दाहाल खत्रीलाई आनाको १० लाख ५० हजार रुपैयाँ मूल्याङ्कन गरि राजिनामा पास गरी दिने भन्दै खत्रैले २०७६मंसिर ३० गते बैना रकम ३५ लाख लिई ठगी गरेका थिए । जग्गाधनी मीना खड्का र जग्गा खरिद गर्ने ५ जनाले प्रहरीमा दिएको जाहेरीको आधारमा प्रहरीले जग्गा किर्ते गरी बेच्नेहरुलाई प्रक्राउ गरिएको महानगरी प्रहरी परिसर काठमाण्डौंका प्रवक्ता प्रहरी उपरीक्षक रमेशकुमार बस्नेतले जानकारी दिए । उनले भने– पक्राउ परेका नौजनालाई ठगी, लिखतसम्वन्धी कसूर र संगठित अपराधको मुद्धा चलाइएको छ ।

Facebook Comments Box
ad