तीनलाख ४० हजारले कोरोना बिरुद्धको खोप लगाए

समाज स्वास्थ्य

रामेछाप । कोरोना भाइरसबिरुद्धको पहिलो चरणको खोप अभियान अन्तर्गत तेस्रो प्राथमिकतामा परेकालाई खोप लगाउने काम शनिवारवाट सकिदै छ । उक्त अभियानमा हालसम्म ३ लाख ४० हजार नेपालीले कोरोना बिरुद्धको खोप लगाइसकेका छन् ।
गएको आइतवार शुरु भएको खोप अभियानमा सीमा सुरक्षामा खटिएका सुरक्षाकर्मी, पत्रकार, जनप्रतिनिधि, पछिलो चरणमा छुटेका स्वास्थ्यकर्मी, एम्वुलेन्स तथा शब बाहन चालकहरु, स्वास्थ्य स्वयसेवकहरु र शब व्यवस्थापनमा खटिएका सुरक्षाकर्मीहरुलाई खोप लगाइएको हो । यसअघि गएको माघ २४ गते पहिलो र माघ ३० गते दोश्रो प्राथमिकतामा परेकाहरुलाई कोरोना बिरुद्धको खोप लगाइएको थियो ।
कोरोना बिरुद्धको पहिलो चरणको खोपमा प्राथमिकतामा परेका अग्रपक्तिंमा रहेर काम गर्ने सुरक्षाकर्मी, स्वास्थ्यकर्मी, एम्बुलेन्स चालक, शबबाहन चालक, कारागारका कर्मचारी, कैद बन्दी, सरसफाईमा काम गर्ने व्यक्तिलाई लगाइएको थियो । त्यसैगरी दोश्रो प्राथमिकतामा दूतावासका कर्मचारी, पत्रकार, राष्ट्रसंघको एजेन्सीमा कार्यरत कर्मचारीले पनि खोप लगाएका छन् ।
भारत सरकारले सिरम इन्स्टिच्युटले उत्पादन गरेको दश लाख मात्राको कोभिशिल्ड खोप नेपाल सरकारलाई अनुदानमा दिएपछि गएको माघ १४ गतेदेखी नेपालमा कोरोना बिरुद्धको खोप अभियान चलाइएको थियो । स्वास्थ्य मन्त्रालयले फागुन २३ गतेदेखी दोश्रो खोप अभियान चलाउने भएको छ । दोश्रो खोप अभियानमा ६० वर्षमाथिका नागरिकलाई खोप लगाउने तयारी रहेको खोप शाखा प्रमुख डा.झलक शर्मा गौतमले जानकारी दिए ।

Facebook Comments Box

ad ad