चालु शैक्षिक सत्र जेठमसान्तसम्म हुने

शिक्षा समाज

रामेछाप । शिक्षा मन्त्रीस्तरीय निर्णयबाट चालु २०७७ सालको शैक्षिक सत्रलाई आगामी जेठ मसान्तसम्म कायम गरिने भएको छ ।
सरकारले शिक्षा (नवौं सशोधन) नियमावलीमा महामारी वा यस्तै अन्य विपद् वा विकट हिमाली क्षेत्रका कारण शैक्षिक सत्र परिवर्तन गनुपर्ने अवस्था भएमा शिक्षा, विज्ञान तथा प्रविधि मन्त्रालयले शैक्षिक सत्र परिर्वतन गर्नसक्ने व्यवस्था गरेको छ ।संशोधित नियमावली फागुन ३ गते राजपत्रमा प्रकाशित भएको छ ।
संशोधित नियमावली अनुसार चालु शैक्षिक सत्रलाई आगामी जेठ मसान्तसम्म लम्ब्याइने र आगामी शैक्षिक सत्र २०७८ साल असार १ गतेबाट शुरु भई शैक्षिक सत्रको अन्त्य सोही वर्षको चैत मसान्तमा हुने शिक्षा मन्त्रालयका प्रवक्ता दीपक शर्माले जानकारी दिए । उनले भने– अब कक्षा ८, एसईई, कक्षा ११ र १२ का वार्षिक परीक्षा आगामी जेठ मसान्तभित्र गरिसक्नुपर्छ । कुन परीक्षा कति गते लिने भन्ने बिषयमा सम्वन्धित परीक्षा नियन्त्रण कार्यालयले नै तय गर्ने भएकाले आ–आफ्नो तालिका निमार्ण गरेर परीक्षा लिन सकिने छ ।
विद्यार्थीहरुले जुन विद्यालयवाट सिकाई गरेको हो सोही विद्यालयबाट एसईईमा सम्मिलित हुन पाउने व्यवस्था छ । शिक्षा मन्त्रालयले ल्याएको आकस्मिक शैक्षिक कार्ययोजनाअनुसार कतिपयले आफू पायकका विद्यालयले सञ्चालन गरेका भर्च्युअल कक्षामा सहभागी समेत भएका थिए । त्यस्ता विद्यार्थीलाई कक्षा ९ मा रजिष्ट्रेसन फाराम नभरेका विद्यालयबाट एसईई परीक्षामा सहभागी हुन अब समस्या नपर्ने गरी मन्त्रालयले नियमावलीमा समेत संशोधन गरेको हाे ।

Facebook Comments Box
ad