भवन पुनर्निमार्ण नहुँदा चिज उत्पादनमा समस्या

अर्थ समाज

रामेछाप । जिल्लाको गुम्देल गाविसमा रहेको चिज उत्पादन केन्द्र थोदुङ्गको भवन भूकम्पले भत्काएपछि पुननिर्माण हुन नसक्दा चिज उत्पादनमा समस्या भएको छ ।
जिल्लाकै जेठो र सरकारी स्वामित्वमा रहेको चिज उत्पादन केन्द्रको भवन भत्किएपछि उत्पादन भएको चिज भण्डारण गर्न र कृषकले ल्याउने दूध राख्न समेत समस्या भएको कर्मचारीको भनाई छ । चिज उत्पादन र भण्डारणको समस्या मात्रै हैन भवन नहुँदा कर्मचारीको दैनिकी पनि कष्टकर बनेको छ । सो ठाउँमा वर्षैभरी चिसो हुने र फागुन चैत्रसम्म हिँउ पर्ने भएकाले जस्ताको टहरामुनी बस्दा सारै कष्ट भएको चिज उत्पादन केन्द्रका कर्मचारी जितबहादुर जिरेलले वताए ।
उनले भने– भवनको अभावमा चिज कारखानामा प्रयोग हुने सामाग्रीहरु समेत बाहिरै खुल्ला चौरमा राख्ने गरिएको छ । चिज बनउने मेशिन बाहेक सबै सामाग्री खुल्ला चौरमै राखिएको छ । दुग्ध संस्थान केन्द्र लैनचौरमा पटक–पटक आफ्नो समस्याको बारेमा जानकारी गराउँदा पनि सुनुवाई नभएको कर्मचारी जिरेलले गुनासो गरे । कार्यालयको नियम अनुसार काम गर्न समय लाग्ने भन्दै केन्द्रले आलटाल गरेको कर्मचारीले गुनासो गरे ।
वि.स.२०१५ सालमा स्थापना भएको थोदुङ्ग चिज उत्पादन केन्द्र रामेछापको एकमात्र सरकारी स्वामित्वमा रहेको चिज उत्पादन केन्द्र हो । सो केन्द्रमा अहिले २२ चौरी गोठबाट दूध आउने गरेको छ । दूध कृषकलाई समयमै पेस्कि रकम दिन नसक्दा केही कृषकहरु निजी चिज उत्पादन केन्द्रमा गएको कर्मचारीले बताए । गुम्देलको अधिकांस शेर्पा समुदायले चौरीको दूध बेचेर जीविकोपार्जन गर्दै आएका छन् ।


चौरी दूध ब्यवसायिहरुले वर्षमा २ लाख ५० हजार रुपैयाँसम्म नाफा कमाउने गरेको चोरी पालक आङ्गफुर्वा शेर्पाले वताए । विगतका वर्षहरुमा जेष्ठ महिनाबाट चिज उत्पादन गर्न सुरु हुने गरेको भए पनि पछिल्ला वर्षहरुमा चौरी छिट्टै ब्याउँन थालेपछि चैत्रदेखि असोज महिनासम्मलाई चिज उत्पादनको मौसमी महिनाको रुपमा लिने गरिएको छ ।

Facebook Comments Box
ad