डिएसपी ढुंगेल तारेखमा छुटे

बिशेष समाज

रामेछाप । सर्वोच्च अदालतले नेपाल प्रहरीका प्रहरी नायव उपरीक्षक कुमुद ढुंगेललाई साधारण तारेखमा छोड्न आदेश दिएको छ ।
प्रहरी नायव उपरीक्षक ढुंगेललाई धरौटी रकम लिने गरि निर्णय गरेको उच्च अदालत पाटनको फैसलालाई सर्वोच्च अदालतले बदर गर्दै ढुंगेलको पक्षमा फैसला गरेको    हो । शुक्रवार सर्वोच्च अदालतका न्यायाधीस शुरुषोत्तम भण्डारी र प्रकाश ढुंगानाको संयुक्त इजलासले प्रहरी नायव उपरीक्षक ढुंगेललाई साधारण तारखेमा छाड्ने जिल्ला अदालत काठमाण्डौंको आदेश सदर गरेको हो ।
नेपाल प्रहरी फोर्सभित्र अनुसन्धानको क्षेत्रमा काबिल मानिने ढुंगेललाई २०७५ चैत्रमा काठमाण्डौंको रानिबारी स्थित लोकेन्द्र शेरचनको घरमा भएको लुटपाटमा संलग्न विक्रम श्रेष्ठसँग निरन्तर टेलिफोन सम्र्पकमा रहेको भन्दै महानगरीय अपराध महाशाखाले ढुंगेललाई प्रतिवादी बनाएर प्रहरी प्रतिवेदनको आधारमा सरकारी वकील कार्यालयमा अनुसन्धान प्रतिवेदन बुझाएसँगै सरकारी वकील कार्यालयले अभियोग पत्रसाथ जिल्ला अदालत काठमाण्डौंमा मुद्धा दर्ता गरेको थियो ।
सरकारी वकील कार्यालयले बुझाएको अभियोगका आधारमा जिल्ला अदालत काठमाण्डौंले २०७७ असार पहिलो साता प्रहरी नायव उपरिक्षक ढुंगेललाई साधारण तारेखमा छाड्ने आदेश दिएको थियो । जिल्ला अदालत काठमाण्डौंले गरेको फैसला चित्त नबुझेको भन्दै त्यसको विरुद्ध सरकारी वकील कार्यालय काठमाण्डौंले उच्च अदालत पाटनमा पुनरावेदनको लागि निवेदन दिएको थियो ।
सरकारी वकील कार्यालयले पेश गरेको अभियोगको आधारमा उच्च अदालतले प्रहरी नायव उपरिक्षक ढुंगेलसँग १ लाख रुपैयाँ धरौटी रकम माग गरेको थियो । उच्च अदालत पाटनले गरेको फैसला विरुद्ध ढुंडेल पुनः सर्वोच्च अदालतमा गएका थिए । सर्वोच्च अदालतले उच्च अदालत पाटनले गरेको आदेश बेरितको देखिएको भन्दै जिल्ला अदालत काठमाण्डौंको आदेशलाई नै सदर गरेपछि प्रहरी नायव उपरिक्षक ढुंगेल पुनः काममा फर्कने भएका हुन् ।

Facebook Comments Box
ad