चारबर्ष अघि शुरु गरेको मोटरेबल पुल अलपत्र

अर्थ समाज

रामेछाप । जिल्लाकै दुर्गम क्षेत्र मानिएको उमाकुण्ड गाउँपालिका वडा नं–१ गुम्देलको क्यामा खोलामा निमार्णाधिन पक्की मोमरेबल पुल ठेकेदारको चरम लापरवाहिका कारण चार वर्षदेखी अलपत्र अवस्थामा रहेको छ ।
उक्त पुल निमार्ण गर्न ३ वर्ष अघि तत्कालीन जिल्ला विकास समिति मार्फत संचालित स्थानीय सडक पुल कार्यक्रम अन्तर्गत सो पुलको टेण्डर आव्हान गरिएको थियो । कार्यालयले प्रकाशन गरेको सूचनाको आधारमा खम्पाचे थापा जेभीले उक्त पुल निमार्ण गर्ने जिम्मेवारीका साथ सम्झौता गरेको थियो । निमार्ण व्यवसायीले काम शुरु गरेको केही समयमा नै काम रोकेपछि उक्त काम अहिलेसम्म अलपत्र अवस्थामा रहेको हो ।
निमार्ण व्यवसायीले क्यामा खोलामा एकतर्फ पुलको जग हालि छोडेर हिडेपछि अहिले ती जगमा प्रयोग भएका रडहरु खियाले खाएर छियाछिया भएका छन् भने वाटो हिड्ने वटुवाले रड हल्लाउँदा केही भाचिएका छन् त केही बाङ्गिएका समेत छन् । पुलको उत्तर तर्फको जगको केही भाग काम भएता पनि दक्षिण तर्फको काम भने केही भएको छैन् । पुल निमार्णको लागि पटकपटक ताकेता गर्दा समेत निमार्ण व्यवसायीले कुनै वास्ता नगरेको उमाकुण्ड गाउँपालिका वडा नं–१ गुम्देलका वडा अध्यक्ष नुर्बु शेर्पाले वताए ।
उनले भने– यो दुर्गम गाउँमा न सरकारको आँखा पर्छ न कुनै विकासका कामहरु हुन्छन् । भएको एउटा पुल पनि ३ वर्ष देखी अलपत्र अवस्थामा रहेको छ । पुल निमार्णको काम सम्पन्न गरिदिन आफु धेरै निकायमा धाउँदा समेत कामले गति लिन नसकेको अध्यक्ष शेर्पाले जानकारी दिए ।
पुलको काम शुरुवात गरेर विचमै छाडेका निमार्ण व्यवसायीले तत्कालीन जिल्ला विकास समिति विघटन भएको र स्थानिय पुल कार्यक्रमले समेत रामेछापवाट कार्यक्रम बहिर्गमन भएको बहानाबाजी गरी पुलको काम रोकेको गुम्देलका वडा सचिव गणेश थापाले जानकारी दिए । उलने भने–तत्कालिन जिल्ला विकास समिति विघटनको मौका छोपी निमार्ण व्यवसायीले काम छोडेका हुन् ।
तीन वर्षदेखी अलपत्र परेको उक्त पुल हेर्ने जिम्मेवारी अहिले प्रदेश सरकार अन्तर्गत पूर्वाधार विकास कार्यालयले जिम्मेवारी पाएको छ । गुम्देलको क्यामा खोलामा निमार्णाधिन पक्की मोटरेवल पुल निमार्णको लागि ५३ लाख रुपैयाँको अख्तियारी कार्यालयमा प्राप्त भएकाले साविककै ठेक्का सम्झौता वमोजिम उक्त काम अघि वढाइने पूर्वाधार विकास कार्यालय रामेछापका प्रमुख सोमराज तिमिल्सेनाले जानकारी दिए ।
उत्तरी क्षेत्र गुम्देलको क्यामामा निमार्णाधिन उक्त पुल निमार्ण सम्पन्नभएपछि गुम्देल–क्यामा र लाहाछेवरका नागरिकहरुलाई आवात जावतमा सहज हुनेछ । क्यामा खोलामा पुल नहुँदा गुम्देलवाट ७ घण्टाको पैदल हिडेर लाहाछेवरसम्म नागरिकहरु हिड्न विवश छन् । त्यसैगरी ती क्षेत्रमा उत्पादन भएका कृषि उपजहरु किसानहरुले वजारसम्म लैजान समेत पाएका छैनन् ।
पुल निमार्ण नहुँदा किसानहरुले अहिले डोकाको भरमा उत्पादित वस्तुहरु ओसार पसार गर्ने गरेका छन् । उक्त लेकाली क्षेत्रमा उत्पादन हुने आलु, छुर्पी, वा, चिज, सेतो सिमी, फापर लगाएतका वस्तुहरु वढी मात्रामा उत्पादन हुने गर्दछन् । उत्तरी क्षेत्रमा पर्ने गुम्देल जाने सवै सडक कच्ची र उच्च हिमाली भुभाग भएका कारण वर्षातको समयमा प्रयाप्त वर्षात हुने र हिउँदको समयमा मात्रै सवारीसाधनहरु संचालन हुने गरेका छन् ।

Facebook Comments Box

ad ad