संसद बिघटनको विरुद्ध काँग्रेसले गर्यो–८ वटै स्थानिय तहमा बिरोधसभा

प्रदेश ३ राजनीति

रामेछाप । नेपाली काँग्रेस जिल्ला कार्यसमिति रामेछापले अहिलेको वर्तमान केपीशर्मा ओली समुहको नेकपाको सरकारले गरेको संसद विघटनको असंवैधानिक तथा अलोकतान्त्रिक कदमको बिरोधमा शनिवार जिल्लाको ८ वटै स्थानिय तहमा र्याली सहितको बिरोध कार्यक्रम गरेको छ ।
सरकारले संसद विघटन गरेको बिषयलाई लिएर नेपाली काँग्रेसले आज एकैदिन देशभरका स्थानिय निकायमा सरकार विरुद्ध आन्दोलन निकालेको हो । नेपाली काँग्रेस रामेछापले जिल्लाका ८ वटै स्थानिय तह केन्द्रित आन्दोलनमा व्यानर सहित निस्किएको जुलसमा “उखान टुक्के बोलीले देश डुबायो ओलीले” र संसद विघटन खारेज गर जस्ता विभिन्न नारा सहित हजारौं कार्यकर्ताहरुको सहभागीता रहेको थियो ।
काँग्रेसले सरकार बिरुद्ध निकालेको बिरोध कार्यक्रममा मन्थली नगरपालिकाको देवकोटा चोकमा नेपाली काँग्रेस रामेछापका जिल्ला सचिव लेखबहादुर कार्की, रामेछाप नगरपालिका रामेछाप बजारमा नेपाली काँग्रेसका कोषाध्यक्ष कुमार श्रेष्ठ, लिखुतामाकोशी गाउँपालिकाको धोवीबजारमा नेपाली काँग्रेसका महासमिति सदस्य कृष्णवहादुर महत, उमाकुण्ड गाउँपालिकाको प्रितीमा नेपाली काँग्रेसका सचिव बिष्णु वस्नेत लगाएतका नेताहरुले सम्बोधन गरेका थिए । कार्यक्रममा सहभागी नेताहरुले अहिलेको वर्तमान केपी शर्मा ओलीको सरकारले गरेको संसद विघटन तत्काल खारेज गर्नुपर्ने धारणा राखेका थिए ।


त्यस्तैगरी नेपाली काँग्रेस रामेछापले संसद विघटनको विरुद्धमा खाँडादेवी गाउँपालिकाको माकादुममा महासमिति सदस्य बीरवहादुर तामाङ्ग, दोरम्वा गाउँपालिकाको टोकरपुरमा महासमिति सदस्य पूर्णवहादुर तामाङ्ग (कान्छाराम), सुनापति गाउँपालिकाको हिलेदेवीमा नेपाली काँग्रेसका पूर्व पार्टी सभापति रामचन्द्र खड्का र गोकुलगंगा गाउँपालिकाको रस्नालुमा पार्टी सभापति लवश्री न्यौपाने लगाएतका नेताहरुले सम्वोधन गरेका थिए ।
बिरोध कार्यक्रममा अहिलेको नेकपाको सरकारले संघीय लोकतान्त्रिक गणतन्त्रात्मक संविधान भत्काउने र मुलुकलाई अस्थिरता, अनिश्चितता र अराजकता तर्फ लगेकाले नेपाली काँग्रेसले एकैसाथ देशभर चरणबद्ध आन्दोलनको कार्यक्रम लिएर अघि वढेको नेपाली काँग्रेसका जिल्ला सभापति लवश्री न्यौपानेले बताए ।
त्यसैगरी विरोध कार्यक्रममा बोल्दै नेपाली काँग्रेसका पूर्व सभापति रामचन्द्र खड्काले भने अहिलेको केपी ओली नेतृत्वको वर्तमान सरकारको निरंकुश, सर्वसत्त्तावादी र अधिनायकवादी चरित्रका कारण संसद विघटन गरेको भन्दै यसको विरुद्धमा सशक्त ढङ्गले कडा भन्दा कडा सघर्षका कार्यक्रम लिएर काँग्रेस अघि वढेको बताए ।
जिल्लाको ८ वटै स्थानितहमा भएको बिरोध सभामा बोल्ने अन्य नेपाली काँग्रेसका नेताहरुले वर्तमान सरकारका प्रधानमन्त्री केपी ओलीले संसद विघटन गरेर असंवैधानिक कदम गरेको भन्दै यसको विरुद्धमा यो कार्यक्रमको आयोजना गर्नु परेको बताएका थिए । काँग्रेसले गरेको बिरोध कार्यक्रममा नेपाली काँग्रेसका बिभिन्न भातृ संघ÷संघठनका पदाधिकारीहरु, शुभेच्छुक र पार्टीमा आस्था राख्ने हजारौंको संख्यामा कार्यकर्ताहरुको उपस्थिती रहेको थियो ।

Facebook Comments Box
ad