रामेछाप । मन्थली सहिद स्मृति क्याम्पस स्वतन्त्र विद्यार्थी युनियन मन्थलीले क्याम्पस भित्र लोकसेवा आयोगको तयारी कक्षा आरम्भ गरेको छ । क्याम्पसमा अध्ययनरत लोक सेवा आयोगको तयारी गर्न चाहने विद्यार्थिहरुलाई सहज होस भन्नका लागि स्ववियुले बुधवार बाट कक्षा आरम्भ गरेको हो ।
उक्त तयारी कक्षाको प्रमुख आतिथ्यता बागमती प्रदेशका उद्योग,पर्यटन,वन तथा वातावरण समिति सभापति एवं सांसद आनन्द श्रेष्ठले गर्नु भएको थियो । कार्यक्रमका अवसरमा बोल्दै सांसद श्रेष्ठले स्ववियुले सञ्चालन गर्न लागेको लोकसेवा तयारीको कक्षा लाई उपयोगी कक्षाका रूपमा ग्रहण गर्न आग्रह गर्नु भयो । उहाँले तयारी कक्षालाई आम विद्यार्थिहरुले सकारात्मक र व्यवहारिक शिक्षाका रूपमा उपयोग गर्नका लागि पनि विद्यार्थी साथीहरूलाई आग्रह गर्नु भयो ।
सो क्रममा उहाँले पछिल्लो समयमा युवा विद्यार्थी माझ अध्ययन गर्ने वानिमा गिरावट आउनुका साथै उहिरुमा देखिँदै आएको नकारात्मक पक्षलाई सकारात्मक तर्फ उन्मुख गराउन पनि यो कक्षा वरदान साबित हुने बताउनु भयो । उहाँले स्ववियुले गर्न लागेको कार्यक्रम विद्यार्थीको क्षमता विकासका लागि कोषे डुङ्गा साबित हुने भन्दै विद्यार्थी साथीहरूलाई समय पूर्वक गहिरिएर नियमित कक्षामा सामेल भएर गहिरो अध्ययन गर्न पनि सुझाव दिनु भयो ।
कार्यक्रममा बोल्दै स्ववियु सभापति अविनाश कार्कीले आम विद्यार्थी साथीहरूको भावना अनुसार स्वतन्त्र विद्यार्थी युनियनले आयोगको तयारीकक्षा सञ्चालन गर्न लागेको जानकारी दिनु भयो । करिब ३ महिना सम्म सञ्चालन गरिने लोकसेवा आयोगको कक्षाको तयारीका लागि इच्छुक सबै साथीहरूलाई निःशुल्क सहभागी गराइने पनि कार्कीले बताउनु भयो । कक्षा सञ्चालनका लागि स्ववियुको निर्णय अनुसार स्ववियु कोषबाट खर्च गरिने र कक्षामा विषय विज्ञहरूलाई समावेश गराइने कुरा पनि सभापति कार्कीले जानकारी दिनु भयो ।
स्ववियुका सचिव सुशील थापाको सञ्चालनमा भएको उक्त कार्यक्रममा नेपाल पत्रकार महासङ्घका जिल्ला अध्यक्ष बद्री नयाँघरे,क्याम्पस प्रमुख भरत कुमार श्रेष्ठ,मन्थली माविका प्रअ टंक दाहाल,नेपाल विद्यार्थी सङ्घका जिल्ला अध्यक्ष विनोद बुढाथोकी लगायतका वक्ताहरूले स्ववियुले सञ्चालन गर्न लागेको लोकसेवा आयोगको तयारी कक्षामा विद्यार्थिहरुलाई नियमित सहभागी भएर त्यसबाट भरपुर फाइदा लिनका लागि पनि आग्रह गर्नू भयो ।
