काठमाडौँ । बागमती प्रदेशको रिक्त राष्ट्रियसभा सदस्य उपनिर्वाचनका लागि ५ राजनीतिक दल दर्ता भएको छ । बिहीबार निर्वाचन आयोगले दल दर्ताको काम टुङ्ग्याउँदै निर्वाचन चिन्ह, क्रम निर्धारण तथा मतदाता नामावलीको विषयमा निर्णय गरेको हो ।
आयोगका अनुसार नेकपा(एमाले) लाई सूर्य चिन्ह दिदै पहिलो नम्बरमा दर्ता गरेको छ । त्यस्तै दोस्रो नम्बरमा दर्ता भएको नेपाली काँग्रेसलाई रुख चिन्ह प्रदान गरेकोे छ । तेस्रो नम्बरमा नेकपा(माओवादी केन्द्र) ले गोलाकारभित्र हँसिया हथौडा चिन्ह पाएको छ । त्यस्तै चौथो नम्बरमा दर्ता भएको राष्ट्रिय प्रजातन्त्र पार्टीलाई हलो चिन्ह र पाँचौँ नम्बरमा दर्ता भएको नेपाल मजदुर किसान पार्टीलाई मादल चिन्ह आयोगले प्रदान गरेको छ ।
त्यस्तै आयोगले निर्वाचनका कूल मतदाताको सङ्ख्या पनि टुङ्गो लगाएको छ । आयोगका अनुसार प्रदेशसभा सदस्य ११० जना र गाउँपालिकाका अध्यक्ष, उपाध्यक्ष तथा नगरपालिकाका प्रमुख, उपप्रमुख २३८ जना गरी जम्मा ३४८ जना मतदाता रहने जनाएको छ ।