रामेछाप । ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ(कान्छाराम) ले रामेछापका कार्यालय प्रमुखहरूको मनपरी अब अन्त्य हुने बताउनु भएको छ । नेपाल आदिवासी जनजाति पत्रकार महासङ्घ(फोनिज) रामेछापको २५ औँ स्थापना दिवसको उद्घाटन गर्दै रामेछापका अधिँकास कार्यालय प्रमुखहरूको मनपरी अब अन्त्य हुने बताउनु भएको हो ।
रामेछापका कार्यालय प्रमुखहरू कार्यालय भन्दा बढी घरमा बस्ने र कार्यालयको काम नगर्ने काम लिएर गएका नागरिकले सोधेको अवस्थामा फिल्डमा रहेको जवाफ दिने गरेको बताउनु भएको छ । साथै रामेछापका कार्यालय प्रमुखहरूले अत्यधिक सवारी साधनको दुरुपयोग गरेको भन्दै त्यसको विरोध समेत गर्नु भएको छ । रामेछाप बाट प्रत्येक शुक्रवार २० वटा भन्दा बढी सरकारी सवारी साधन काठमाडौँ जाने र आइतबार र सोमबार मात्र जिल्ला फर्कने गरेको बताएका छन् । प्रत्येक हप्ता लाखौँको इन्धन खर्च गरेरकार्यलय प्रमुखहरू घर जाने प्रचलन अन्त्य हुन पर्ने बताउनु भएको हो ।
साथै मन्त्री कान्छारामले मुलुकमा राजनीतिक स्थिरता, सुशासन र आर्थिक विकास गरी देश विकासका लागि काँग्रेस र एमालेले मिलेर सरकार बनाएको बताउनु भएको छ । ‘‘आज देशका ठुला पार्टीहरू नेकपा एमाले र नेपाली काँग्रेस देश बनाउनुपर्छ भनेर लागेका छन् । जनताको चाहना अनुसार मुलुकको विकास गरी समृद्ध बनाउन सकिएन । जसका कारण जनताले धेरै दुःख पाए । अब देश बनाउन दुई वटा ठुला पार्टी मिल्नुको विकल्प छैन भनेर अहिलेको सरकार बनेको हो । अब यो सरकारले जनचाहना अनुसार विकास गर्छ ।”
अहिले दुई वटा ठुला पार्टी मिलेर सरकार चलाउँदा देश विकासले गति लिन्छ भन्ने सबैमा सकारात्मक भावनाको विकास भएको राज्यमन्त्री तामाङको भनाइ छ ।
जिम्मेवारी लगायत अन्य कुराहरूका हिसाबले प्रधानमन्त्री कार्यालय पछि दोस्रो ऊर्जा, जलस्रोत तथा सिँचाइ मन्त्रालय भएको बताउँदै राज्यमन्त्री तामाङले यो मन्त्रालयले धेरै काम गर्न सक्ने बताउनुभयो । उहाँले नेपाल विद्युत् प्राधिकरणमा लामो समयदेखि ३ हजार ७ सय भन्दा बढी करारका कर्मचारीहरूले काम गरिरहेको भए पनि उनीहरूको सेवा सुविधा लगायतका बारेमा भएका सहमति समेत कार्यान्वयनमा आउन नसकेको बताउनुभयो । रामेछाप जिल्लाको विद्युतीकरणलाई नाङ्गा तार रहित बनाउनका लागि पनि आफू लागि पर्ने उहाँले बताउनुभयो । उहाँले भन्नुभयो “रामेछाप जिल्ला अहिले ६० प्रतिशत नाङ्गो तार रहित बनिसकेको छ । अब ४० प्रतिशत ठाउँहरूमा अझै नाङ्गो तार छ । यसलाई पनि चाँडो भन्दा चाँडो नाङ्गो तार रहित बनाउन आवश्यक योजना सहित लागिपरेको छु । यो काम पनि चाँडै हुन्छ ।”
