रामेछाप । भगवान पछीको भगवान भनेको डाक्टर भएको नेपाली कांग्रेसका पुर्व महामन्त्री डाक्टर शशांक कोइराराले बताएका छन् । जिल्ला अस्पताल रामेछापमा गंगालाल फाउन्डेसनले संचालन गरेको मुटुरोग सम्बन्धि स्वास्थ्य शिविरमा सम्बोधन गर्दै नेता कोइरालाले डाक्टरी पेशा सबै भन्दा ठुलो पेशा भएको बताए । राजनितिक क्षेत्रमा विवेक प्रयोग गरेर नहुने भन्दै डाक्टरी पेशामा भनेको आफ्नो विवेक प्रयोग गरेर उपचार गर्न सकिने भएकोले बिरामीहरुको सेवा हृदयबाट विवेकको प्रयोग गरेर गर्नुपर्ने बताए ।

कार्यक्रमलाई सम्बोधन गर्दै नेता कोइरालाले डाक्टरहरुलाई आफ्नो दक्षता नागरिकको सेवामा प्रयोग गर्न समेत आग्रह गरेका छन् । नेता कोइरालाले भने ‘शिविरमा आएका बिरामीलाई आफ्नै आमा÷बुबा, दाजुभाइ भनेर हेर्नुहोस्, अरु मान्छे भन्ने नठान्नुस् । भगवानको मुनितिर कोही छन् भने डाक्टरहरु छन् ।’ आफू डाक्टरी पेसा छोडेर राजनीतिमा आएको प्रसङ्ग जोड्दै नेता कोइरालाले भने– ‘डाक्टरी पेसा आफ्नो दिमाग प्रयोग गरेर उपचार गर्ने हो, आफ्नो हातले गर्ने हो तर राजनीति कहिल्यै पनि आफ्नो कन्ट्रोलमा हुँदैन ।

राजनीतिमा विभिन्न खाले उथलपुथल हुन्छ त्यसमा रमाउन सक्नुपर्छ, म रमाइरहेको छु ।’ सर्वश्रेष्ठ पेसा कुनै छ भने त्यो डाक्टरी पेसा छ कोइरालाले भने । एकदिने शिविरमा ३ सय ५० जनाको स्वास्थ्य जाँच गरिएको सहिद गङ्गालाल प्रतिष्ठानका उपाध्यक्ष नरेश महर्जनले जानकारी दिए । शिविरका लागि सहिद गङ्गालाल राष्ट्रिय हृदय केन्द्रबाट चिकित्सकसहितका स्वास्थ्यकर्मीहरुको जम्बो टोली रामेछाप जिल्ला अस्पताल पुगेका थिए । जिल्लामै मुटु रोग सम्बन्धी स्वास्थ्य जाँच गराउन पाउँदा सेवाग्राही पनि खुसी भएका छन् । शिविरमा निःशुल्क, छिटो र राम्रो सेवा पाइएको रामेछाप नगरपालिका–३ का सेवाग्राही सन्तोषकुमार प्रधानले बताए । यस्ता स्वास्थ्य शिविरहरु गाउँगाउँसम्म लैजानु पर्ने उनको भनाइ छ । रामेछाप जिल्लामा मुटु रोग सम्बन्धी स्वास्थ्य शिविर सञ्चालन गरिएको यो पहिलो पटक हो ।