रामेछाप । बागमती प्रदेशका सामाजिक विकास मन्त्री कुमारी मोक्तानले बागमती प्रदेश सरकारले विश्व विद्यालय स्थापना गर्ने तयारी गरेको बताएका छन् । शनिवार रामेछापको सदरमुकाम मन्थलीमा रहेको सहिद स्मृति बहुमुखी क्याम्पसको तेस्रो क्याम्पस सभालाई सम्बोधन गर्दै प्रदेश ‘शिक्षा नीति अन्तिम चरणमा पुगेको भन्दै बागमती प्रदेशले अब छिटै विश्वविद्यालय सञ्चालन गर्ने बताए ।
अहिलेको शिक्षाले विद्यार्थीको माग र बजारको आवश्यकता समेट्न नसकेको भन्दै अबको शिक्षाले बजारको आवश्यकता र विद्यार्थीको रुचि अनुसारको मागलाई समेट्नु पर्ने बताए । कार्यक्रमलाई सम्बोधन गर्दै मन्त्री मोक्तानले भने –अब बजारको आवश्यकता अनुसारको शिक्षा ल्याउनु सक्नु पर्छ । यदि विद्यार्थीको रुचि र बजारको आवश्यकता बुझेनौ भने युवा नेपालमा हुने छैन । त्यसका लागी हामीले शिक्षा नीति तयार पारि सकेका छौँ ।
प्रदेश सरकारले विश्व विद्यालय सञ्चालनमा ल्याएपछि नेपालमा सर्वसुलभ मूल्यमा डाक्टर पढ्न पाइन्छ । अहिलेको शिक्षा नीतिले विद्यार्थीहरूलाई आकर्षण गर्न नसकेको अध्ययन प्रतिवेदन प्रस्ट्याएको । अहिलेको नीतिमा कुन जिल्लामा के पठनपाठन आवश्यक छ । त्यसको व्यवाहिरक शिक्षा प्रदान गर्न प्रदेश सरकार लागेको छ मन्त्री मोक्तानले भनिन् ।
त्यस्तै आगामी आर्थिक वर्षबाट शैक्षिक सुधारको लागि प्रदेशका ४० वटा क्याम्पसलाई १० लाखको दरले अनुदान दिने समेत बताइन् । विगत देखिनै ‘छोरी बुहारी छात्रवृत्ति’ गाउँ–गाउँमा बस्ने छोरी बुहारी दिदी बहिनीलाई प्रदान भइरहेको उल्लेख गर्दै यसलाई निरन्तर सञ्चालनमा रहेको बताइन् । साथै मन्त्री मोक्तानले नीति र विधि भित्र रहेर मन्थली क्याम्पसलाई आवश्यक सहयोग गर्ने प्रतिबद्धता समेत जनाइन् ।
