काठमाण्डौं । नेपालमा इन्टरनेट सेवा ठप्प हुन सक्ने इन्टरनेट सेवाप्रदायक संस्था (आइस्पान) जनाएको छ । सेवाप्रदायकका अनुसार नेपालका इन्टरनेट सेवाप्रदायक (आईएसपी)ले अपस्ट्रिम सेवाप्रदायकलाई भुक्तानी दिन नसक्दा इन्टरनेट सेवा ठप्प हुने अवस्था आएको बताएका छन् ।
हुन त एक साताअगाडि १३ वैशाखमा पत्रकार सम्मेलन गरेर इन्टरनेट सेवाप्रदायक संस्था (आइस्पान) ले नेपालमा इन्टरनेट सेवा ठप्प हुन सक्ने चेतावनी दिएको थियो । सरकारलाई तिर्नुपर्ने शुल्क विवादका कारण सरकारले नेपालका सेवाप्रदायकलाई विदेशी मुद्रा सिफारिस रोकिदिएका कारण यस्तो अवस्था आएको आइस्पानले बताएको छ ।
यही विवादका कारण विगत नौ महिनादेखि ब्यान्डविथ आयातका लागि आईएसपीहरूले अपस्ट्रिम सेवाप्रदायकलाई भुक्तानी गर्न सकिरहेका छैनन् । नेपालमा आयात हुने कुल ब्यान्डविथमध्ये भारतीय कम्पनी एयरटेलको हिस्सा ७० प्रतिशतभन्दा बढी छ ।
१३ वैशाखको पत्रकार सम्मेलनमा आइस्पानका पूर्व अध्यक्ष विनय बोहोराले भारतीय कम्पनी एयरटेललाई करिब ३० मिलियन अमेरिकी डलर भुक्तानी दिन बाँकी रहेको बताएका थिए । सोही शुल्क तिर्न नमिल्दा एयरटेललगायतले नेपालमा इन्टरनेट काटेको सेवाप्रदायकले जनाएका छन् । इन्टरनेट अवरुद्ध हुनासाथ उनीहरूले म्यासेज र आफ्नो सामाजिक सञ्जालमार्फत ग्राहकलाई यस्तो जानकारी दिएका थिए ।
मन्त्रालय स्रोतका अनुसार भने इन्टरनेट एकाएक बन्द भएपछि मन्त्रालयले नै अनुरोध गरेर भारतबाट नेट नकाट्न पहल गरेको थियो । त्यसपछि तत्कालका लागि इन्टरनेट सुचारु भए पनि यो जुनसुकै समयमा जान सक्ने सम्बद्ध स्रोत बताउँछ । त्यस्तै, तत्कालका लागि सुचारु भए पनि एयरटेललगायतका अपस्ट्रिम सेवाप्रदायकलाई शुल्क तिर्ने काम बाँकी रहेको र सरकारले विदेशी मुद्रा भुक्तानीका लागि विदेशी मुद्रा सटही सिफारिस नगरिदिएसम्म समस्याको हल नहुने सेवाप्रदायकहरूको दाबी छ ।
