मोरङ । मोरङको सुन्दरहरैँचा–७ का अस्मिता न्यौपानेले पहिले आफूले विष खाइन्, त्यसपछि दुई छोरीलाई खुवाएर हत्या गरिन् तर आफु भने कम बिष सेवन गरेको कारण बाँचिन ।
श्रीमान अर्जुन कार्की सँगको झगडा भएपछि शुक्रबार दुई काखे छोरीलाई लिएर कोठा देखि निस्किएकी अस्मिता न्यौपानेले पहिले आफूले विष खाएको खुलेको छ । आफुले पहिला बिष खाएर त्यसपछि उनले तीन वर्षीया छोरी अर्पणा र एक वर्षीया छोरी आइकालाई विष खुवाएको मोरङका प्रहरी उपरीक्षक नवराज कार्कीले जानकारी दिए । एसपी कार्कीका अनुसार कम विष खाएकाले अस्मिता बाँचे पनि नाबालिका दुई छोरीको भने मृत्यु भएको छ ।
‘सोधपुछका क्रममा अस्मिताले पहिले अलिकति आफूले विष खाएको र त्यसपछि दुई छोरीलाई खुवाएको बताएकी छिन् । विष खुवाएको केहीबेरमै छोरीहरूको मृत्यु भएपछि अस्मिता मोबाइल त्यहीँ छाडेर हिँडेकी रहिछन्,’ एसपी कार्कीले भने ।
अस्मितालाई बुधबार बिहान झापाको विर्तामोडबाट झापा प्रहरीसँगको समन्वयमा मोरङ प्रहरीले पक्राउ गरेको छ । कोशी अञ्चल अस्पताल विराटनगरमा उनको स्वास्थ्य परीक्षण पनि गरिएको छ । एसपी कार्कीका अनुसार केहीबेरमा पत्रकार सम्मेलन गरेर उनलाई सार्वजनिक गरिने छ ।
मोरङको सुन्दरहरैँचा–७ मा बन्दै गरेको नयाँ घरमा पानी नलगाएको विषयलाई लिएर श्रीमान् अर्जुन कार्की र श्रीमती अस्मिताबीच शुक्रबार साँझ झगडा भएको थियो । झगडापछि अस्मिता आफ्नी दुई छोरीलाई लिएर त्यही दिन राति ८ बजेतिर घरबाट निस्किएकी थिइन् ।