रामेछाप । नेकपा माओवादी केन्द्रको अध्यक्ष पुष्पकमल दाहाल ‘प्रचण्डको नेतृत्वमा मन्त्रीपरिषद गठन भएको छ । दाहालको नेतृत्वमा तीन उपप्रधानमन्त्री सहित आठ सदस्यीय मन्त्रिपरिषद् गठन गरेको छ । मन्त्रिपरिषदमा प्रधानमन्त्री प्रचण्डले ३ जनालाई उपप्रधानमन्त्री बनाएका छन् । नेकपा एमालेका उपाध्यक्ष विष्णु पौडेल, नेकपा माओवादी केन्द्रका बरिष्ठ उपाध्यक्ष नारायणकाजी श्रेष्ठ र राष्ट्रिय स्वतन्त्र पार्टीका सभापति रवि लामिछाने उपप्रधानमन्त्री बनेका छन् ।
सोमबार राष्ट्रपति भवन शितल निवासमा सोमबार आयोजित कार्यक्रममा विष्णु पौडेलले अर्थमन्त्री, भौतिक पूर्वाधार तथा यातायातमन्त्रीमा नारायणकाजी श्रेष्ठ र गृहमन्त्रीमा रवि लामिछानेले पद तथा गोपनियताको शपथ लिएका छन् ।
अर्थमन्त्री पौडेलले यसअघि पनि अर्थमन्त्रीको जिम्मेवारी सम्हालेका थिए । माओवादी केन्द्रका वरिष्ठ उपाध्यक्ष समेत रहेका नेता श्रेष्ठले यसअघि पनि परराष्ट्रमन्त्री र गृह मन्त्रालयको जिम्मेवारी सम्हालिसकेका छन् । त्यस्तै गरी मन्त्रीहरू ज्वालाकुमारी साह, दामोदर भण्डारी, राजेन्द्रकुमार राई र अब्दुल खान पनि मन्त्रिपरिषदमा सहभागी भएका छन् ।
खान सिके राउत नेतृत्वको जनमत पार्टीका उपाध्यक्ष हुन् भने अन्य तीन मन्त्रीहरू नेकपा एमालेका हुन् । उनीहरूको जिम्मेवारी पछि तोकिने भएको छ । आइतबार मात्रै नेकपा (माओवादी केन्द्र) का अध्यक्ष दाहाललाई राष्ट्रपति भण्डारीले नेपालको ४४ औं प्रधानमन्त्रीमा नियुक्त गरेकी थिइन ्।
