काठमाडौँ । राष्ट्रिय परीक्षा बोर्डले परीक्षा दिइरहेको अवस्थामा टिकटक भिडियो बनाई सामाजिक सञ्जालमा राख्ने एक विद्यार्थीको परीक्षा रद्द गरेको छ । कक्षा १२ को परीक्षा दिइरहेको अवस्थामा टिकटक भिडियो बनाई सामाजिक सञ्जालमा राखेको भन्दै दैलेखको कालिका माध्यमिक विद्यालय सिंहासैनमा अध्ययनरत विद्यार्थी रोशन कुमार शाहीको परिक्षा रद्द गरेको हो । शाहीले परीक्षाको मर्यादा विपरित परीक्षा सञ्चालन भइरहेको अवस्थामा टिकटक भिडियो बनाई सामाजिक सञ्जालमा राखेको भेटिएकोले उनको सम्पूर्ण विषयको परीक्षा रद्द गरिएको राष्ट्रिय परीक्षा बोर्डले जानकारी दिएको छ ।
त्यस्तै गरी परिक्षामा निरीक्षकका रूपमा खटिएका शिक्षक कमलबहादुर शाही र केन्द्राध्यक्ष चक्रबहादुर शाहीलाई तीन वर्षसम्म कुनै पनि परीक्षामा सहभागी हुन नपाउने गरी विभागीय कारबाही गर्न शिक्षा, विज्ञान तथा प्रविधि मन्त्रालयलाई सिफारिस गरेको छ । गत मङ्सिरमा भएको परीक्षामा उनले परीक्षा दिएकै बेला टिकटक बनाएका थिए । उनको टिकटक भिडियो सामाजिक सञ्जालमा भाइरल भएपछि राष्ट्रिय परीक्षा बोर्डप्रति विभिन्न टीकाटिप्पणी आएको थियो ।
