रामेछापमा कागती खेती गर्ने बढे

अर्थ कृषि
  • 106
    Shares

रामेछाप । मूल्य राम्रो आउन थालेपछि रामेछापका कागती खेती गर्ने किसान बढ्दै गएका छन् । परम्परागत खेती गर्दै आएका रामेछापका किसानहरु पछिल्लो समय जलवायु परिर्वतन सँगै समयमा वालिनाली लगाउन नपाउने र लगाएको वालीहरु समेत विभिन्न रोगको संक्रमण भएर उत्पादन कम भएसँगै त्यसको विकल्पको खेती गर्न थालेका छन् । पछिल्लो समय कागतीको माग गाउँघर र वजारमा समेत बृद्धि भएसँगै किसानहरु कागती खेती तर्फ लागेको हुन् ।
रामेछापमा केही वर्षअघिसम्म गाउँमा उत्पादन भएको कागती विक्री नभएर हैरानी खेप्दै आएका किसानहरुको समस्या टरेको छ । अहिले किसानहरुले उत्पादन गरेको कागती गाउँमै राम्रो मूल्यमा विक्री हुन थालेपछि किसानहरु यसखेती तर्फ थप आकर्षित भएका हुन् । गाउँमा उत्पादन भएको कागती विक्री नहुँदा किसानहरुले कागतीको रस निचारेर चुक अमिलो पारेर राख्ने गरेका थिए ।
पहिलाको समस्या अहिले हटेको छ । कागती फल्नासाथ किसानहरुको घरमै पुगेर व्यवसायीहरुले खरिद गर्न थालेका छन् । कागती प्रति गोटा ६ देखी ७ रुपैयासम्म गाउँघरमै विक्री हुन थालेपछि किसानहरु यस खेतीलाई थप व्यवसायिक रुपमा शुरु गरेको रामेछाप नगरपालिका वडा नं–७ का किसान रविन्द्र हायुले वताए ।
बजारमा माग अनुसारको कागती जिल्लामा उत्पादन नहुँदा व्यवसायीहरुले तराई र वाह्य जिल्लावाट आयात गर्नुपर्ने वाध्यता थियो । आयातित कागती जिल्लामा उत्पादन भएको भन्दा दाना सानो हुने र रस समेत कम हुने तर पैसा धेरै पर्ने गर्दथ्यो । तर अहिले किसानहरुले कागती उत्पादन गर्न थालेपछि दाना पनि ठूलो हुने वढी रस हुने हुँदा व्यवसायीहरुले किसानको खेतवारीमै पुगेर खरिद गर्ने गरेका छन् ।
परम्परागत रुपमा घरवरपर १÷२ वोट कागती रोपेर आफ्नो परिवारलाई मात्रै पुग्ने गरी लगाउँदै आएका किसानहरु अहिले कागती विक्रीवाट राम्रो आम्दानी हुन थालेपछि व्यवसायीक रुपमा खेती गर्न थालेको मन्थली नगरपालिका वडा नं–१३ का किसान ओमकार अधिकारीले जानकारी दिए ।
उनले भने–व्यवसायीहरुको माग अनुसारको कागती हामीले उत्पादन गर्न सकेका छैनौं । कागतीको माग धेरै छ । हामी यसलाई थप विस्तार गरी उत्पादन समेत वढाउने योजनामा लागि परेको पनि कृषक अधिकारीले वताए ।
वजारमा माग अनुसारको कागतीको दाना किसानहरुले उत्पादन गर्न नसक्दा व्यवसायीहरुले विभिन्न वाह्य जिल्लावाट आयात गर्ने गरेका छन् । किसानहरुले व्यवसायीले खोजेजति कागती जिल्लामा नै उत्पादन गर्न सके वजारको समस्या नरहेको कृषि ज्ञान केन्द्र रामेछापले जनाएको छ ।

Facebook Comments

  • 106
    Shares